Ndryshime në qeveri? Ja kur Rama do të mbledhë Asamblenë Kombëtare

Partia Socialiste do të mbledhë Asamblenë Kombëtare. Mësohet se takimi do të zhvillohet më 4 shtator në orën 16:30.

Mbledhja do të mbahet në kompleksin “Xibraku” në Tiranë.

Në një konferencë për shtyp, të zhvilluar më herët, kryeministri Edi Rama i pyetur për ndryshimet në qeveri, u shpreh se do të duhet të pritet edhe pak deri në zhvillimin e mbledhjes Asamblesë Kombëtare.

Po ashtu Rama u pyet edhe lidhur me zgjedhjet e parakohshme dhe nëse do të ketë të tilla. Rama i cilësoi si thashetheme që mund të bëhen vetëm ‘nëpër çadrat e plazhit’.

“Mos humbisni kohë me këto thashetheme që janë për nën çadrën e plazhit dhe jo për të humbur kohën ne këtu në godinën e qeverisë”, tha ndër të tjera Rama.

Tashmë, ethet e ndryshimeve kanë nisur edhe në Këshillin e Ministrave.

Data 4 shtator do të jetë një ditë vendimtare, për të mësuar se kush nga ministrat e kabinetit ‘Rama 3’ do të qëndrojnë e kush ikën.