Sekretari i përgjithshëm i PS-së, Damian Gjiknuri ka deklaruar nga qyteti i Shkodrës nga ku prezantoi drejtuesen politike të PS për këtë qark, Edona Bilali, se socialistët janë të gatshëm që të ulen me Partinë Demokratike dhe të bisedojnë për ndryshimet Kushtetuese.
I pyetur nga gazetarët nëse PS është e gatshme që t’i ofrojë PD ndryshimet e reformës territoriale që kërkon Basha në këmbim të dakordësisë së PD për ndryshimet kushtetuese në organet e Vettingut, tha se PS, siç ka deklaruar edhe kryeministri Rama është e gatshme që të dialogojë me PD por në institucione dhe jo jashtë tyre për reforma dhe çështje të ndryshme.
Sipas Gjiknurit propozimet duhet të bëhen në tryezë dhe jo në media, ku tashmë që PD është pjesë e institucioneve, sipas tij mund të bisedojnë hapur.
“PS dhe kryeministri Rama e ka thënë edhe në Kuvend që ne jemi të gatshëm të ulemi dhe të dialogojmë me PD, dialogimi nuk bëhet me diplomacinë e megafonit as me deklarata për shtyp, dialogimi bëhet që të ulemi në tryezë siç kemi bërë reformën zgjedhore më parë, siç kemi bërë reforma të tjera. Kryeministri e tha që ne jemi të gatshëm pavarësisht pikëpamjeve të ndryshme që kemi qoftë për reformën në drejtësi, qoftë për reformën territoriale apo edhe për probleme të reformës zgjedhore nëse ata duan të adresojnë këto çështje e mira është edhe një dialog që zhvillohet në institucione. PD është në institucione dhe ne e mirëpresim në çdo kohë. Për përmbajtjen është shpejt të flasim sepse ai është produkt i tryezave të përbashkëta”.
Ndërkohë, i pyetur lidhur me konfliktin mes Berishës dhe Bashës, Gjiknuri ka ndjekur porosinë e Ramës, duke u distancuar dhe mos reaguar.
“Nuk dua të futem në akuzat që kanë ata me njëri-tjetrin. Ky është një problem i tyri i brendshëm. PS është e gatshme të dialogojë me PD-në zyrtare kushdo që merr përsipër të përfaqësojë dhe që do të shprehë interesat e demokratëve për ata ndryshime që ata mendojnë të nevojshme. Por negociatat dhe politikbërja zhvillohet në institucione dhe ne jemi të gatshëm të dialogojmë në çdo kohë me ta”, tha Gjiknuri.
Kujtojmë se Kryetari i Partisë Demokratike, Lulzim Basha, u shpreh në mbledhjen e Këshillit Kombëtar , se ndryshimet kushtetuese të vitit 2008 nuk ishin të përshtatshme për nevojat e shoqërisë për demokraci.
