Ka nisur Referendumi që Serbia do të mbajë sot për ndryshimet kushtetuese që kanë të bëjnë me gjyqësorin. Sipas mediave serbe, votimi ka nisur në orën 7:00 dhe do të vijojë deri në orën 20:00 të mbrëmjes për të gjithë qytetarët serbë, jo vetëm në Serbi, por edhe në Kosovë, të cilët do të votojnë sot për këto ndryshime. Qytetarët serbë në Kosovë do të mund ta ushtrojnë të drejtën e tyre të votimit në referendumin e thirrur nga Serbia në rreth 8 mijë qendra votimi. Autoritetet thanë se qytetarët serbë, me shtetësi të dyfishtë, mund të votojnë përmes postës apo zyrës ndërlidhëse të Serbisë në Prishtinë.
Pyetja e referendumit thotë: “A jeni për konfirmimin e Ligjit për ndryshimin e Kushtetutës së Republikës së Serbisë?”, kurse qytetarët deklarohen duke rrethuar përgjigjen “po” apo “jo”. KQZ konstatoi se në Serbi janë 6.510.323 votues, për të gjitha njësitë e vetëqeverisjes lokale dhe në të gjitha vendet.
Kujtojmë se Beogradi ka paralajmëruar “pasoja afatgjata” nëse Prishtina nuk lejon mbajtjen e tij në zonat e banuara me shumicë serbe në Kosovë. Shefi i grupit parlamentar të Listës Serbe, Igor Simiç, tha se ndalimi i referendumit është “kulmi i veprimeve antiserbe të qeverisë së kryeministrit Kurti”.
Diplomatët e Shteteve të Bashkuara, Francës, Gjermanisë, Italisë, Britanisë së Madhe dhe Bashkimit Evropian krahas thirrjeve që të lejohet mbajtja e referendumit, u kërkuan qeverive të Kosovës dhe Serbisë “që të përmbahen nga veprimet dhe retorika që rrisin tensionet dhe të angazhohen në mënyrë konstruktive në dialogun e lehtësuar nga Bashkimi Evropian.
Komisioni i Zgjedhjeve në Serbi mori vendimin ditën e djeshme për serbët e Kosovës, të cilët do të mund të votojnë në Referendumin serb për gjyqësorin në disa qytete në jug të saj. Ky vendim u publikua pak orë pasi parlamenti i Kosovës mbështeti vendimin e qeverisë, për të mos lejuar hapjen e qendrave të votimit në Kosovë, për referendumin e Serbisë mbi ndryshimet kushtetuese, që mbahet sot.
Discussion about this post