Kuvendi do të mblidhet në një seancë plenare ditën e hënë për të votuar mbi dekretet e Presidentit Bajram Begaj përsa i takon ministrave të rinj të Qeverinë Rama.
Sipas Kuvendit, bëhet me dije se seanca do të mbahet ditën e hënë 11 shtator në orën 14:00.
Pas miratimit në Parlament, ministrat e rinj pritet të bëjnë betimin dhe nisin zyrtarisht punën.
Gjatë Asamblesë Kombëtare të PS-së, më 4 shtator, kryeministri Rama prezantoi dhe ndryshimet në kabinetin qeveritar.
Nga ndryshimet e bëra u prekën 6 ministri, ndërkohë që u shkri Ministria për Standardet dhe Shërbimet.
Por u shtua një tjetër Ministri pa protofol, ajo e Pushtetit Vendor, e cila do të drejtohet nga Arbian Mazniku.
Kryeministri ia besoi postin e ministrit për Europën dhe Punët e Jashtme, Igli Hasanit, një diplomat karriere, që zëvendësoi Olta Xhacckën, e cila mbetet jashtë Qeverisë.
Ogerta Manastirliu është larguar nga Ministria e Shëndetësisë dhe është emëruar si Ministre e Arsimit dhe Sportit, dikaster që drejtohej nga Evis Kushi. Kjo e fundit pritet të drejtojë një nga Sekretariatet në PS.
Ministrja Delina Ibrahimaj është zhvendosur nga Ministria e Ekonomisë dhe Financave për të marrë drejtimin e Ministrisë së Shtetit për Sipërmarrjen dhe Klimën e Biznesit.
Në Ministrinë e Finanacave dhe Ekonomisë është emëruar Ervin Meta.
Deputetes së PS Anila Denaj i është besuar posti i ministrisë së Bujqësisë, duke zëvendësuar Frida Krifcën. Denaj u rikthye në Qeveri, ndërsa më parë mbante postin e ministres së Financave.
Ministër i Shëndetësisë dhe Mbrojtjes Sociale është emëruar Albana Koçiu.
Discussion about this post