Temperatura në Evropë është rritur me 2,3°C krahasuar me epokën para-industriale (1850-1900), me një ritëm dy herë më të shpejtë se mesatarja globale që nga vitet 1980, njoftuan OKB-ja dhe programi Evropian Copernicus.
Në një kohë kur temperatura globale është rritur me 1.2°C për shkak të emetimeve të gazeve që shkaktojnë efektin serë, ” Evropa është rajoni i botës që po ngrohet më shpejt”, kujton profesor Petri Taalas, Sekretari i Përgjithshëm i Organizatës Meteorologjike të Kombeve të Bashkuara në raportin e publikuar sot.
Në nëntor, Organizata Botërore Meteorologjike kishte njoftuar se temperatura e Evropës po rritej me një normë prej 0.5°C në dekadë, domethënë dy herë më shpejt se mesatarja e pesë rajoneve të tjera meteorologjike të planetit.
Në pjesën më të madhe të Evropës, “temperaturat më të larta kanë përkeqësuar thatësirat e rënda dhe të përhapura, kanë nxitur zjarre të ashpra pyjore që janë përgjegjëse për zonën më të madhe të djegur të regjistruar ndonjëherë në kontinentin evropian dhe kanë shkaktuar vdekje të tepërta në mijëra për shkak të valëve të të nxehtit”, thotë Petri Taalas në prezantimi i raportit.
Sipas bazës së të dhënave të urgjencave (EM-DAT), ngjarjet ekstreme meteorologjike, hidrologjike dhe klimatike në Evropë në vitin 2022 prekën drejtpërdrejt 156,000 njerëz dhe shkaktuan 16,365 vdekje, pothuajse ekskluzivisht për shkak të valëve të të nxehtit.
Që nga viti 1980 , fatkeqësitë meteorologjike (valët e të nxehtit, përmbytjet…) kanë shkaktuar vdekjen e 195,000 njerëzve, njoftoi sot Agjencia Evropiane e Mjedisit.
Humbjet ekonomike , të lidhura kryesisht me përmbytjet dhe stuhitë, vlerësohen në rreth 2 miliardë dollarë për vitin 2022, shumë më pak se 50 miliardë dollarët e vitit 2021 për shkak të përmbytjeve.
Viti 2022 “për fat të keq, nuk është një rast unik apo paradoks klimatik”, komenton Carlo Buodembo, drejtor i Observatorit të Ndryshimeve Klimatike (C3S) të Bashkimit Evropian, Copernicus.
“Është pjesë e një tendence që do t’i bëjë ngjarjet e stresit ekstrem të nxehtësisë më të shpeshta dhe më intensive në të gjithë rajonin .”
Por kishte edhe një dritë shprese në raport: vitin e kaluar në Evropë, burimet e rinovueshme prodhuan më shumë energji elektrike (22.3%) sesa lëndët djegëse fosile (20%), për herë të parë.
Discussion about this post