Në një periudhë 7-vjeçare qeveria shqiptare dhe ajo e Kosovës kanë firmosur në total 86 marrëveshje, memorandume dhe protokolle bashkëpunimi. Ajo çka bie në sy është se pjesa më e madhe e tyre nuk janë zbatua, madje janë harruar dhe mbeten nën hije.
Kujtojmë se, mbledhja e parë u mbajt më 11 janar 2014 në Prizren, ku kryeministrat e Shqipërisë dhe Kosovës, Edi Rama dhe Hashim Thaçi e cilësuan këtë ngjarje si historike për të dy vendet dhe nënshkruan deklaratën për partneritet strategjik. Më pas, ish-kryeministri Isa Mustafa erdhi në Tiranë dhe së bashku me Ramën në mbledhjen e 23 marsit 2015 do të nënshkruanin 5 marrëveshje, 4 memorandume dhe 2 protokolle bashkëpunimi. Një vit më vonë , me 3 qershor 2016 në Prishtinë u nënshkrua një tjetër marrëveshje. Sakaq, mbledhja e 4 e dy qeverive u mbajt ne Korçë më 27 nëntor 2017, ku kryeministrit Rama dhe Ramush Haradinaj nënshkruan marrëveshjet dhe memorandumet e radhës.
Një vit më vonë të njëjtit kryeministra mbledhjen e vazhduan më 26 nëntor në qytetin e Pejës. Nën sloganin “bashkë pa kufij, në një rajon pa kufij” u mbajt mbledhja e gjashtë më 2 tetor 2020 ne Tiranë, ku kryeministër i Kosovës ishte Avdulla Hoti. Ajo çka është arritur është se, pas 7 viteve takime dhe mbledhje, me vendimin e së mërkurës të qeverisë shqiptare një shtetas nga Kosova mund të marrë lejen e qëndrimit vetëm me një aplikim për 5 vite në Shqipëri dhe brenda saj edhe lejen e punës. Ndërsa në Kosovë, që prej qershorit të këtij viti, qeveria ka vendosur heqjen e leje qëndrimit të përkohshëm për qytetarët shqiptarë. Po ashtu, është rënë dakord që qytetarëve të dy vendeve do t’u njihen periudhat e sigurimit dhe të kontributeve.
Discussion about this post