Presidentja e Komisionit Evropian, Ursula von der Leyen, u tregua jo aq optimiste sa Presidenti i Këshillit Europian, Charles Michel, lidhur me një afat se kur vendet e Ballkanit Perëndimor mund të anëtarësohen në BE.
Në konferencën për mediat, në përfundim të Samitit për Procesin e Berlinit, von der Leyen tha se nuk ka një datë për integrimin e Shqipërisë në Bashkimin Europian.
Në përgjigje të interesit të gazetarëve në konferencën që përmbylli samitin, Ursula von der Leyen theksoi se praktika e Bashkimit Europian është që integrimi realizohet në bazë të meritës.
“Është një proces me meritë dhe është më përfitues për vendet gjithashtu, sepse janë përpjekjet dhe sukseset e tyre që i çojnë përpara dhe gjithashtu për t’i shtyrë për të marrë hapat e nevojshme.
Është e bazuar në meritë. Nëse merrni përsipër reformën, do merrni financime dhe fonde. Është një proces tepër i saktësuar dhe kjo është metodologjia që kemi pranuar”, tha ajo.
Në të njëjtën linjë qëndroi dhe kancelari gjerman Olaf Scholz. “Duhet të bëhet sa më shpejt e mundur, por vendet duhet të punojnë shumë që ta arrijnë”, u shpreh ai.
Më herët gjatë samitit, Presidenti i Këshillit Europian, Charles Michel shprehu besimin se “duhet të jemi gati në të dyja anët deri në 2030 për t’u zgjeruar”.
Michel u shpreh se BE kërkon të vijojë me procesin e zgjerimit pasi sipas tij është investim në begatinë e anëtarëve aktualë dhe atyre të ardhshëm.
Ai shtoi se vendet e rajonit kanë pritur shumë, aq sa e kanë krahasuar zgjerimin me “një nuse, të cilës nuk i vjen dhëndri”.
Megjithatë ai shtoi se Bashkimi Evropian në këtë moment “po përgatit dasmën”.
Discussion about this post