Ish-deputeti socialist Alqi Bllako ka kërkuar heqjen e arrestit me burg me pretendimin se nuk është i rrezikshëm dhe nuk do t’i shmanget hetimit për skandalin e inceneratorëve. Bllako ka ankimuar vendimin që e ka lënë në burg, ndërsa kjo lëvizje e tij vjen pak ditë pasi u mor në pyetje nga SPAK, ku deklaroi se nuk e ka shpërdoruar kurrë detyrën.
Para prokurorëve të SPAK, Bllako tha se nuk ka pasur gisht dhe kompetenca në procedura për inceneratorët. Sipas tij procedura është kryer dhe është ndjekur nga komisioni i ngritur për këtë çështje në Ministrinë e Mjedisit.
Ndër të tjera, ai ka treguar se ka pasur detyrë vetëm ta përcjellë shkresën Këshillit të Ministrave për Miratim. Sa i përket akuzës së korrupsionit për punësimin e babait të tij në mënyrë fiktive në inceneratorin e Tiranës, Bllako është shprehur se kontrata për punësimin e babait të tij nuk është firmosur nga Klodian Zoto, por nga ana e administratorit Italian. Gjithashtu ai ka shtuar se babai i tij ka prishur kontratën e punës disa muaj përpara se të firmosej aktmarrëveshja për inceneratorin e Fierit.
Kujtojmë se Bllako përfundoi në pranga pasi në dosjen e SPAK rezulton si i përfshirë në aferën e inceneratorët të Fierit, ku sëbashku me ish-ministrin Lefter Koka kanë kryer një sërë shkeljesh në përfitim të shumave monetare.
Discussion about this post