Tre ish-presidentët e Shqipërisë, Alfred Moisiu, Rexhep Mejdani dhe Bamir Topi së bashku me ish-kryeministrin Pandeli Majko janë nisur sot drejt Hagës për të vizituar ish-krerët e UÇK-së.
Lajmi është konfirmuar nga anëtari i stafit të deputetit Behgjet Pacolli, Jetlir Zyberaj i cili ka publikuar një foto të ish-liderve shqiptar duke hipu në avion.
Udhëtimi për të takuar ish-krerët e UÇK-së, të cilët gjenden në paraburgim prej dy vitesh, përfshinte një ftesë për të gjithë ish-krerët e shtetit të Kosovës dhe Shqipërisë.
Ish-presidentët e Kosovës, Fatmir Sejdiu dhe Atifete Jahjaga kanë refuzuar ftesën ku Sejdiu ditë më parë tha se nuk dëshiron të flasë, dhe se qëndrimi i tij dihet.
“Shiko, unë e kam dhënë dje një përgjigje. Nuk kam çka shtoj tjetër dhe të komentoj më shumë. […] Unë e kam dhënë një përgjigje dje dhe s’kam çfarë merrem më tepër. E kam dhënë qëndrimin tim dhe pikë. Qëndrimin tim e kam dhënë edhe në konferenca për shtyp vazhdimisht, apo në debatet që i kam mbajtur dhe i kam qëndrimet që i dini të gjithë”.
Ndërkohë në këtë udhëtim mungon dhe ish-presidenti dhe kreu i Partisë Demokratike Sali Berisha, i cili ka pasur përplasje të forta me ish-presidentin Hashim Thaçi, lidhur me të ashtuquajturën ‘teza e ndryshimit të kufinjve’. Në distancë dy palët akuzuan njëri-tjetrin, por pas arrestimit të Thaçit, Berisha nuk ka dalë kundër tij.
Ish-krerët e Ushtrisë Çlirimtare të Kosovës ndodhen në paraburgim në Hagë prej muajit Nëntor të vitit 2020, pasi akuzohen për krime lufte dhe krime kundër njerëzimit. Deri tani prokuroria ka administruar provat dhe dëshmitë e atyre që pretendojnë se janë torturuar nga Thaci, Veseli, Krasniqi dhe bashkëpunëtorët e tyre gjatë luftës në Kosovë në vitin 1999. Dhomat e Specializuara dhe Zyra e Prokurorit të Specializuar që ndryshe njihen edhe si Gjykata Speciale hetojnë krimet e pretenduara të pjesëtarëve të Ushtrisë Çlirimtare të Kosovës, të kryera kundër pakicave etnike dhe rivalëve politikë që nga janari i vitit 1998 deri në dhjetor të vitit 2000.
Discussion about this post