Në kërkim nga Spanja, arrestohet në Durrës italiani

Një italian është arrestuar në Durrës për llogari të autoriteteve spanjolle. Në pranga është vënë Roberto Basco, 59 vjeç.

“Ky shtetas ishte shpallur në kërkim ndërkombëtar, pasi Gjykata Provinciale e Madridit, Spanjë, me vendimin e datës 19.09.2019, e ka dënuar me 6 vjet burgim, për veprën penale ‘Trafikimi i lëndëve narkotike’, parashikuar nga Kodi Penal i Spanjës. Nga dënimi i kanë mbetur për të kryer 1 vit e 5 muaj burgim”, njoftoi policia.

“Më datë 26.02.2019, në aeroportin e Madridit, në valixhet e shtetasit Roberto Basco, janë gjetur 7 pako me lëndë narkotike kokainë (me peshë totale rreth 5.6 kg), që i kishte sjellë nga Kolumbia, me qëllim shitjen. Vijojnë procedurat për ekstradimin e këtij shtetasi, në Spanjë”, shtuan të njëjtat burime.

Operacioni për arrestimin e italianit i koduar “Porta”, u krye nga Policia Kufitare Durrës në bashkëpunim me Interpol Tiranën dhe Interpol Madridit, konfirmuan burime zyrtare nga blutë.