Në kërkim për trafik droge, pranga turkut në Muriqan

Një turk i shpallur në kërkim ndërkombëtar është arrestuar teksa po tentonte të futej në Shqipëri përmes piskës së kalimit kufitar në Muriqan. Bëhet fjalë për 34-vjeçarin Azat Oncel, i dënuar nga autoritetet turke për trafik droge.

Oncel rezulton i dënuar nga Gjykata e Krimeve të Rënda e Sakarya/Turqi me 13 vjet, 2 muaj e 10 ditë burg, ndërsa i ka mbetur edhe 10 vjet e 20 ditë për të shlyer nga dënimi. Ndaj tij rëndon akuza për veprën penale “Trafikim të lëndëve narkotike”.

“Në hyrje të Pikës së Kalimit Kufitar Muriqan, shërbimet e Policisë Kufitare si rezultat i masave të shtuara dhe shkëmbimit të informacionit me Interpol Tiranën, kanë ndaluar një shtetas të shpallur në kërkim ndërkombëtar:     Azat Oncel, 34 vjeç, banues në Turqi. Gjykata e Krimeve të Rënda e Sakarya/Turqi e ka dënuar me 13 vjet, 2 muaj e 10 ditë, koha e mbetur për tu kryer nga ky dënim është 10 vjet e 20 ditë, për veprën penale “Trafikim të lëndëve narkotike”, njoftoi Policia e Shkodrës.