Fëmijët e moshës 5 vjeç mund të regjistrohen në klasën e parë, është ky propozimi i fundit i Ministrisë së Arsimit, i cili është hedhur për konsultim publik. Kushti i vetëm është që ditëlindja e gjashtë të jetë brenda 31 dhjetorit të atij viti.
Ky propozim sipas institucionit hartues të projektligjit, është bërë duke u mbështetur në ndryshimet e zhvillimit aktual të fëmijëve.
Nëse nisma merr pëlqimin e grupeve të interesit, do i kalojë më pas për shqyrtim në Parlament.
Ndryshimi tjetër që propozon ministria është mos lejimi në arsimin parauniversitar i asnjë mësuesi apo punonjësi, të dënuar më parë për vepra penale që lidhen me të miturit.
Të tilla propozime vijnë pas rasteve të përdhunimeve dhe ngacmimeve seksuale që mësuesit kanë kryer me të mitur.
Sipas Ministrisë së Arsimit ky propozim bëhet për të mbrojtur fëmijët nga individë me potencial rreziku. Ky parashikim shihet si një mundësi më shumë për parandalimin e përsëritjes së veprës penale ndaj të miturive. Projektligji me të tilla ndryshime është në fazë konsultimi publik.
Discussion about this post