Skënderbeu është gati për fillimin e sezonit dhe mbi të gjitha për të bërë mirë duke nisur nga ndeshja e së shtunës kundër Egnatias në stadiumin e Rrogozhinës.
Një prej atyre që debutojnë me fanellën bardhekuqe këtë sezon është edhe portieri Marko Alia, i cili pas aventurës në Itali, kërkon të bëjë shkëlqejë te korçarët.
Në një prononcim të dhënë për median sportive “Panorama Sport”, titullari i Skënderbeut flet për ndeshjen e parë përballë Egnatias, të cilën e shikon delikate për shkak të cilësisë së kundërshtarit. Por, kjo nuk e tremb portierin, i cili ka bindjen se Skënderbeu do të përballet si i barabartë me çdo kundërshtar.
“Tashmë po fokusohemi tek ndeshja jonë e parë në kampionat, pasi mbyllëm me sukses fazën përgatitore.
Normalisht është përgjegjësi për ne, pasi nisim këtë edicion të Superiores dhe duhet që të bëjmë prezantim dinjitoz që në ndeshjen e parë.
Kalendari na ka vendosur përballë Egnatias, që është një ekip i mirëndërtuar dhe mbi të gjitha ka nisur kompeticionet me herët se ne.
Forma detyrimisht është më e mirë e tyre, por kjo nuk do të thotë asgjë. Një ekip që ka luajtur ndeshje elitare si ajo ndaj Interit është tregues i forcës së tyre, por ne nuk kemi pse të druhemi.
Do të jemi gati për të shtunën, për të bërë një paraqitje sa më të mirë dhe treguar vlerat tona. Do të jetë një test i parë që do të tregojë se sa vlejmë. Ne jemi gati dhe nuk i druhemi askujt”, ka thënë fillimisht portieri bardhekuq.
I ndalur tek ajo që pret nga ky sezon me Skënderbeun, Alia shprehet optimist, ndërsa ofron siguri duke iu referuar faktit se skuadra ka në përbërje ele mentë mjaft cilësorë.
Sipas tij, kjo çon në garanci përsa u përket rezultateve në vazhdimësinë e kampionatit.
“Ndoshta në ndeshjet miqësore nuk kemi treguar gjithçka, pasi kemi provuar zgjidhje të ndryshme sa u përket skemave të lojës.
Natyrisht, që kjo fazë është vetëm për të testuar trajneri gjendjen e lojtarëve. Por, cilësi në prapavijë ne kemi dhe për këtë jam i bindur.
Kemi lojtarë me kualitet që mund të na krijojnë qetësi në mbrojtje. Unë jam ndierë që në fillim i sigurt me ta në krah. Tashmë mbetet që ta tregojmë në fushë.
Cilësisht ekipi ka potencial dhe kjo është e sigurtë. Duhet vetëm ta nisim me këmbën e mbarë dhe të vazhdojmë me paraqitjet pozitive”, përfundoi portieri, i cilië është formuar te Lacio dhe është stërvitur me ekipin e parë kur ishte edhe Thomas Strakosha./PanoramaSport
Discussion about this post