Pezullohen nga detyra 4 efektivë të komisariatit të Dibrës që u shfaqën në një prej emisioneve televizive duke konsumuar birra në një lokal, teksa ishin të veshur me uniformë policie.
Vendimi për ta është marrë pas publikimit të pamjeve nga emisioni “Stop”. Ndaj efektivëve ka filluar dhe hetimi disiplinor për shkelje gjatë ushtrimit të detyrës, bazuar në rregulloren e disiplinës së Policisë së Shtetit.
Reagim i Drejtorisë Vendore të Policisë Dibër
Në lidhje me një rast të trasmetuar në emisionin investigativ “Stop”, në tv Klan, ku shfaqen disa punonjës policie me uniformë, duke konsumuar në dukje pije alkoolike (birra), sqarojmë se janë identifikuar katër punonjësit që mbajnë detyrën e nd/specialistit SPZ, në Komisariatin e Policisë Dibër.
Menjëherë, Drejtori Vendor i Policisë ka bërë pezullimin e këtyre punonjësve nga detyra, si dhe ka filluar hetimi disiplinor ndaj tyre për shkelje gjatë ushtrimit të detyrës, bazuar në rregulloren e disiplinës së Policisë së Shtetit.
Drejtoria Vendore e Policisë Dibër falënderon emisionin investigativ “Stop”, dhe qytetarët që denoncojnë raste të shkeljes së detyrës nga punonjësit e Policisë, dhe i fton që të vijojnë të denoncojnë çdo rast me të cilin ata bien në kontakt, duke u garantuar reagim të menjëhershëm, ligjor dhe të paanshëm.
Discussion about this post