Ambasadorja e SHBA-së në Tiranë Yuri Kim ka reaguar pas deklaratave në media se deputeti demokrat Oerd Bylykbashi ka ndërmjetësuar për shpëtimin e Sali Berishës nga shpallja “non grata” që i bëri Departamenti Amerikan i Shtetit në maj të këtij viti. Ambasadorja Kim, në një reagim në Twitter shprehet se vendimi i SHBA-së për personat që vendos që të shpallen “non grata” nuk negociohet dhe askush nuk duhet të pretendojë se ishte “ndërmjetës”.
Reagimi i SHBA erdhi pas një deklarate të Baton Haxhiut bërë në studion e emisionit Opinion në Tv Klan, e cila ndezi debati për përplasjen brenda PD-së mes Sali Berishës dhe Lulzim Bashës. Duke debatuar për këtë çështje, Haxhiu u shpreh se deputeti demokrat Oerd Bylykbashi ka ndërmjetësuar për shpëtimin e Sali Berishës. Fillimisht, të ftuarit mbetën të shtangur nga ky informacion, pasi nuk ishin në dijeni, por reagimi i ambasadores amerikane ka qartësuar deklaratën e rreme të Haxhiut.
