Demokratët janë ende të mendimit se duhet gjetur një zgjidhje për të shkuar në zgjedhjet lokale me një kandidat të përbashkët. Në një prononcim për mediat, deputetët e aleatët dhanë mendimin e tyre një natë pasi negociatat mes PD-së zyrtare të drejtuar nga kryedemokrati Sali Berisha dhe Enkelejd Alibeaj, u ndërprenë.
Kreu i Partisë Lëvizja për Zhvillim Kombëtar (LZHK), Dashamir Shehi thotë se nuk ka ndërmend të bashkohet me askënd, pasi nuk e cilëson veten një ‘dele’. Deputeti Gazment Bardhi, që ishte edhe i mandatuari për bisedimet mes dy palëve, u shpreh i keqardhur. Ndërsa deputetja Dhurata Çupi këmbëngul që duhet të gjendet një zgjedhje për të dalë me një kandidat të përbashkët.
Prononcimet për mediat:
Dashamir Shehi: Ne duam një, mënyrën për ta zgjedhur ta gjejnë. Ne nuk bashkohemi me asnjë pse ça jemi ne dele, me kë do të bashkoheni thotë, me asnjë me veten tonë.
Dhurata Çupi: Të gjithë bashkë, të gjithë bashkë për të rrëzuar regjimin e Edi Ramës. Të gjithë bashkë me një kandidat. Ne duhet të bëhemi të gjithë bashkë. Në vitin 2013 e mbani mend shprehjen të bëhen bashkë të gjithë qelbësirat, ndërsa unë sot bëj thirrje të bëhen bashkë të gjithë zonjat dhe zotërinjtë e këtij vendi për të shpëtuar vendin nga regjimi i Edi Ramës.
Gazment Bardhi: I keqardhur, I keqardhur, faleminderit.
Bisedimet mes dy palëve morën një kthesë një natë më parë, kur grupi i Alibeajt doli me njoftimin se në zgjedhjet lokale do të futen me kandidatët e tyre. Alibeaj lajmëroi se kishte ndërprerë çdo negociatë me grupin e Berishës, pasi sipas tij, këta të fundit ishin ulur në bisedime me dy kushte: Njohjen e primareve dhe të lidershipit të Berishës. Ky njoftim u shoqërua nga reagime. Berisha i paralajmëroi kur u tha se ‘i kishin bërë llogaritë gabim’, ndërsa i mandatuari i PD-së, Edi Paloka u shpreh se pas Alibeajt sheh ‘hijen’ e kryeministrit Edi Rama. Por, nuk ndalen me kaq. Sot, në orën 18:00, Bardhi do të mblidhet me deputetët që e mbështesin për të diskutuar edhe një herë rreth kësaj çështjeje.
Discussion about this post