Nënkryetarët dhe Sekretari në mbrojtje të Bashës: Nuk japim dorëheqje!

Nënkryetarët dhe Sekretari i Përgjithshëm i Partisë Demokratike, me anë të një deklarate të përbashkët, i janë përgjigjur thirrjeve të ish-kryeministrit Sali Berisha, që të japin dorëheqjen me arsyen se janë jo legjitim.

Në deklaratën e tyre ata thonë se për shkak të qëndrimit të tyre në mbrojtje të demokratëve dhe interesit të Partisë Demokratike, Sali Berisha ka nisur një fushatë të padenjë sulmesh ndaj tyre.

“Prej disa ditëve, për shkak të qëndrimit tonë në mbrojtje të demokratëve dhe interesit të Partisë Demokratike, z. Sali Berisha ka nisur një fushatë të padenjë sulmesh ndaj Nënkryetarëve dhe Sekretarit të Përgjithshëm të PD. Me keqardhje, përsëritet kërkesa që ne duhet të braktisim Partinë Demokratike dhe demokratët, dhe të bëhemi bashkë me Sali Berishën kundër partisë” – thuhet në deklaratën e tyre.

Sipas tyre kërkesa e Berishës nuk ka asnjë lidhje me PD, asnjë lidhje me standardet demokratike, asnjë lidhje me hallet dhe problemet e demokratëve.

“Secili prej nesh është i vendosur të refuzojë shkeljen e Statutit për interesa personale të Sali Berishës dhe izolimin e Partisë Demokratike. Kërkesa e z. Berisha nuk ka asnjë lidhje me PD, asnjë lidhje me standardet demokratike, asnjë lidhje me hallet dhe problemet e demokratëve. Demokratët kanë 8 vite që përballen me dhunën dhe terrorin e Edi Ramës, me krimin dhe bandat e tij dhe nuk jemi sprapsur as kthyer nga rruga për t’i shërbyer Shqipërisë dhe shqiptarëve. Ne e kemi për detyrë të jeni krah tyre” – shprehen ata.

Më tej ata shprehen se asnjë intimidim nuk do të ndikojë në qëndrimin e tyre krah të demokratëve, për një parti që u shërben atyre dhe jo që të kthehet në mburojë të interesave personale të Sali Berishës.

“Asnjë intimidim nuk do të ndikojë në qëndrimin tonë në krah të demokratëve, për një parti që u shërben atyre dhe jo që kthehet në mburojë të interesave personale të Sali Berishës, aleatëve të tij dhe cilitdo tjetër” – thuhet në deklaratën e tyre” – mbyllet deklarata e tyre.

Kujtojmë se ish-lideri i Partisë Demokratike u ka bërë thirrje gjatë mbajtjes së Foltoreve, nënkryetarëve dhe Sekretarit të Përgjithshëm të Partisë Demokratike që të japin dorëheqjen, pasi sipas tij ata janë zgjedhur në mënyrë jo legjitime.