Erion Veliaj, kryebashkiaku aktual i Tiranës, ndodhet në pritje të vendimit të Gjykatës së Lartë në 8 korrik, i cili mund të përcaktojë fatin e masës së tij të arrestit. Ndërkohë, ai po përballet me një sërë goditjesh nga Kryeministri Edi Rama dhe Partia Socialiste, duke sinjalizuar një izolim të thellë politik.
Pak ditë më parë, Rama u ka thënë socialistëve se “nuk dihet si do të shkojë kjo punë” lidhur me procesin e masës së arrestit për Veliajn. Paralelisht, ai ka intensifikuar izolimin e tij politik duke caktuar disa ministra të marrin përsipër drejtimin e bashkisë. Kjo lë të kuptohet se Veliaj ka mbetur vetëm formalisht në detyrë, duke dërguar një sinjal të qartë tek gjykatësit se nuk gëzon më mbrojtje politike.
Veliaj ka kërkuar vazhdimisht zbutjen e masës së arrestit në të gjitha shkallët e gjyqësorit. Nga bisedat e publikuara prej përgjimeve të SPAK në qeli, ai dëgjohej të shprehte shpresën se vendimi i Gjykatës së Lartë do të ishte përcaktues.
Megjithatë, përveç sinjalit të dukshëm të braktisjes nga Rama, shpresat për Veliajn janë zbehur edhe më tej nga përbërja e trupit gjykues që do të shqyrtojë çështjen e tij këtë të martë. Sipas një analize të Lapsi.al, Gjykata e Lartë ka lënë në fuqi masat e arrestit të marra nga shkallët më të ulëta për politikanë të lartë si Veliaj. Në trupin gjykues, relatore e çështjes është caktuar Albana Boksi, e cila njihet për vendimet e saj të mëparshme në GJKKO, ku ka treguar një linjë të ashpër ndaj kërkesave për zbutjen e masave të arrestit për figura të larta.
Vlen të theksohet se znj. Boksi ka qenë pjesë e trupit gjykues që la në fuqi arrestin e Ilir Metës dhe hodhi poshtë kërkesën për zbutjen e burgimit me arrest në shtëpi për ish-ministrin Lefter Koka, duke argumentuar në të dyja rastet se interesi publik dhe ruajtja e procedurës ligjore janë mbi ndikimin politik dhe pretendimet personale. Kjo praktikë e konsoliduar e dy prej tre gjyqtarëve të panelit sugjeron se do të jetë e vështirë për ta të ndryshojnë qëndrim në rastin e Veliajt.
Shpresa e vetme e mbetur për Veliajn duket se ka qenë presioni mediatiko-politik. Për këtë arsye, njerëz pranë tij kanë angazhuar dy studio lobuese ndërkombëtare, britaniken “Mishcon de Reya LLP” dhe amerikanen “Kasoëitz LLP”, të cilat kanë publikuar një raport ku pretendohet se Veliaj mbahet në burg në mënyrë të padrejtë, duke shkelur Konventën Evropiane për të Drejtat e Njeriut.
Megjithatë, ky presion duket i pamjaftueshëm pa mbështetjen politike të Ramës, i cili duket se e ka braktisur ish-“delfinin” e tij. Heqja e kompetencave nga bashkia, eliminimi i besnikëve të tij dhe sinjalet e fundit nga kryeministri tregojnë se Veliaj ndodhet i vetëm përballë drejtësisë, me shpresa gjithnjë e më të pakta për një vendim të favorshëm nga Gjykata e Lartë.
Discussion about this post