Ditën e djeshme u hodh shorti në Nion të Zvicrës, e ku pretendentët e Ligës së Kampionëve janë njohur me kundërshtarët në fazën 1/8- at.
Bayernit të Mynihut, i vendosur në grupin e ekipeve favorite, sipas analistëve, i ka buzëqeshur fati.
Lazio, për fatin e keq, do të duhet të duelojë me gjigantët e Mynihut, aty ku shpresat rreth kalimit në fazën tjetër janë minimale.
Napoli, Interi dhe PSG vështroheshin paraprakisht si skuadra “serioze” për “armatën” nga Mynihu.
Mbrojtësi i përfaqësueses shqiptare, Elseid Hysaj, do të ketë shansin të prezantojë veten në prapavijë ndaj Harry Kane me shokë.
Nga kampi i gjermanëve është shprehur Manuel Neuer, teksa ka dashur të ndikojë te grupi në marrjen seriozisht të “shqiponjave” romake, pengesë që do t’i dërgojë në raundin e çerekfinaleve.
“Skuadrat italiane kanë pikë të fortë planin taktik dhe i qëndrojnë striktë, sidomos në mbrojtje. Ballafaqimi me ta para dy vitesh na ndihmon, por gjërat ndryshojnë në kohë të shkurtër. Duhet ta pranojmë se do të hyjmë në këtë duel si favoritë, gjithsesi s’do të thotë nënvlerësim ndaj Lazios. Kam kujtime pozitive nga ai stadium. Ne fituam me rezultatin 4-1 në po të njëjtën fazë në vitin 2021.
Atmosfera që krijojnë tifozët italianë mbetet vërtet speciale, njëkohësisht tepër e zhurmshme për ne lojtarët. Të dyja ekipet mezi po e presin ndeshjen, por deri atëherë kemi kohë. Pres t’i fitojmë të dyja duelet”, përfundoi Manuel Neuer.
Discussion about this post