Në fillim ishte Ministrja e Financave, Delina Ibrahimaj, që shpalli një tender 375 milionë lekë të vjetra, për të nisur një fushatë mediatike, në të cilën do të sqarohen qytetarët për paketën e re fiskale. Më pas, Ministria e Mbrojtjes e Niko Peleshit vendosi të shpenzojë 650 milionë lekë të vjetra për “çingije” e “harem”, për të kënaqur shijet e trupave ushtarake.
Në vijim, Operatori i Sistemit të Transmetimit, i drejtuar nga Skerdi Drevona vendosi të shpenzojë 100 milionë lekë të vjetra për organizime eventesh, një fushë që nuk lidhet aspak me aktivitetin e kompanisë shtetërore energjitike, aq më tepër në këtë periudhë kulminante të krizës së dritave. Në fund, nuk mund të mungonte “mjeshtri i propagandës”, kryetari i Bashkisë së Tiranës, Erion Veliaj. Ai pret kandidimin zyrtar për një mandat të tretë në drejtimin e kryeqytetit dhe ka nevojë për shumë reklamë, bujë e spektakël.
Veliaj shpenzoi 830 milionë lekë të vjetra për mikrofona, podiume, set DJ, letra me ngjyra, fishekzjarrë, efekte speciale. Pra, gjithçka në funksion të krijimit të një realiteti virtual, për të mbuluar betonizimin abuziv të kryeqytetit. Në total, janë mbi 1.5 milionë euro të taksave publike, të cilat janë vendosur të shpenzohen këto dy muajt e fundit vetëm e vetëm për shpenzime luksi dhe “hareme” spektakolare, ndërkohë që inflacioni në vend ka arritur në shifrat rekord 8.3 përqind dhe lista e borxheve të qytetarëve në njësitë e shitjes së ushqimeve po rritet me ritëm të frikshëm.
Financat, 375 mln lekë për “leksione”
Ministria e Financave ka vendosu që në dhjetor të këtij viti të shpenzojnë 375 milionë lekë për fushatë mediatike, ku do të shpjegojë paketën fiskale për qytetarët. Pra, kjo është “dhurata” e Vitit të Ri që Delina Ibrahimaj do t’u bëjë taksa-paguesve, dhe sidomos të moshuarve, që presin me shpresë një “gjysëm-gjeli” për të festuar ndërrimin e viteve.
Kësaj radhe, qeveria, nëpërmjet ministres Ibrahimaj, do t’i gostisë me leksione shpjeguese se përse është mirë rritja e taksave. Është ende e paqartë se cila do të jetë përmbajtja e këtyre leksioneve, por me shumë mundësi do t’u tregohen shqiptarët se çfarë të mirash sjell çmimi i karburantit në Shqipëri, edhe pse ai është ndër më të lartët në Europë.
Ibrahimaj do t’u tregoj shqiptarëve se çmimet e naftës që vendos Bordi komunist, siç e ka cilësuar edhe kryeministri Edi Rama, i shërben rritjes ekonomike të qeverisë, duke varfëruar edhe më tej xhepat e qytetarëve. Fushata mediatike për paketën fiskale, do t’u tregojë qytetarëve se rritja e taksave është në të mirë të shëndetit të tyre, pasi ushqehen më pak dhe luftojnë obezitetin. Pra, ato 375 milionë lekë të vjetra që mund të shpërndaheshin për qytetarët, do të shkojnë për leksione e fushatë mediatike.
“Çingijet” dhe “haremi” i Peleshit
Në këto kohë të vështira krize, një ushtri e NATO-s, si ajo shqiptare, ka nevojë për pakëz qetësi mendore e shpirtërore. Ministri i Mbrojtjes, Niko Peleshi, ka menduar për forcat e armatosura. Ushtarakët, si pjesë e çdo familjeje shqiptare, janë në gjendje të vështirë ekonomike për shkak të krizës së thellë dhe rritjes galopante të çmimeve. Peleshi, në mungesë të rritjes së pagave, ka gjetur një mënyrë origjinale për të ngritur moralin e forcave të armatosura.
Në Tetor të këtij viti, Ministria e Mbrojtjes ka shpallur tenderin për organizim eventesh e spektaklesh për forcat e armatosura, me vlerë 650 milionë lekë të reja.
Ministria është kujdesur që t’u ofrojë shërbime speciale ushtarakëve. Në dokumentat e tenderit thuhet se kompania fituese duhet të sigurojë, ndër të tjera, “shërbim hostes”-pra, vajza të reja, të veshura me uniformë, që do të orientojnë pjesëmarrësit në evente.
Ku ka festë pa vajza tërheqëse, që bëhen akoma më joshëse në uniforma “hostes”. Peleshi është treguar i zgjuar. Do të shpenzojë qindra milionë lekë të qytetarëve, por gjithësesi ushtarakët do të kënaqin shikimin për disa momente gjatë aktiviteteve. Më tej, do të rikthehen sërish në familjet e tyre, për të luftuar varfërinë e përditshme.
OST, 100 mln lekë për spektakël
Listës së institucioneve që kanë vendosur të shpenzojnë miliona nga taksat e qytetarëve për spektakle e evente i bashkohet Operatori i Sistemit të Transmetimit (OST). Ky institucion ka rol parësore sigurimin e transmetimit të sigurt të energjisë elektrike tek qytetarët. Detyra e tij është përmirësimi i rrjetit energjitik. Pra, puna e tij është vetëm tela e kablla. Asgjë më shumë. Por, titullari i tij, Skerdi Drenova, ka vendosur të shpenzojë 100 milionë lekë të vjetra për shërbim promovimi.
Procedura është hapur në shtator të vitit 2022 dhe synon blerjen e çadrave, lapsave e stilolapsave me logon e OST, salla për evente, tapete me ngjyra, foltore për aktivitete, bokse, mikrofona, e të tjera të ngjashme. Qeveria ka shpallur gjendjen e emergjencës energjitike. Zv.kryeministrja Belinda Balluku u ka bërë thirrje qytetarëve që të mos bëjnë dush shpesh dhe të lajnë rrobat me 30 gradë, për të kursyer sa më shumë. Tek OST-ja e Skerdi Drenovës nuk janë dëgjuar këshillat për kursim të Ballukut, ndoshta ngaqë aty nuk kanë as dush dhe as lavatriçe.
Veliaj, 830 mln lekë spektakël fushate
Ne krye të listës së institucioneve që kanë vendosur të shpenzojnë miliona për spektakël në kohë krize qëndron kryebashkiaku i Tiranës, Erion Veliaj, i cili është simboli i shpërdorimit të parave publike për propagandë. Veliaj ka shpenzuar së fundmi 830 milionë lekë të vjetra për një tender me objekt “Blerje shërbimi për aktivitete të ndryshme të Bashkisë së Tiranës”. Në listën e shërbimeve të kërkuara nga Veliaj janë bokse muzike, mikrofona, fishekzjarrë, letra me ngjyra, kamera, aparatë fotografikë, podiume, logo, tapete, sixhade, kolltuqe. Pra, gjithçka për takimet pompoze që zhvillon kryebashkiaku i Tiranës në funksion të propagandës së tij politike.
Lexo edhe:Veliaj shpenzon 3.6 mln euro për propagandën, 240 mln lekë vetëm në 2 tendera
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post