Ambasadorja e SHBA-së në Tiranë, Yuri Kim, ka uruar të gjithë qytetarët shqiptarë me rastin e Vitit të Ri. Ambasada amerikane ka postuar në rrjetet sociale një videomesazh të diplomates. Kim ka përmbledhur sfidat me të cilat është përballur Shqipëria gjatë vitit 2021, duke nisur nga reforma në drejtësi, tek krijim i institucioneve si dhe përballje me pandeminë dhe tërmetin.
“Të dashur miq, është e vështirë të besosh se vitit 2021 tashmë po i vjen fundi. Ishte padyshim një vit sfidash të jashtëzakonshme, ndërsa bota vazhdoi të përballej me pandeminë e COVID-19 dhe teksa Shqipëria vijoi rimëkëmbjen pas tërmetit të 2019-ës dhe u përball me përmbytjet dhe zjarret e këtij viti. Pavarësisht këtyre dhe sfidave të tjera, Shtetet e Bashkuara dhe Shqipëria, jo vetëm festuan 30 vjetorin e rivendosjes së marrëdhënieve diplomatike, por dhe bëmë përparim historik drejt forcimit të demokracisë. Me krenari ju mbështetëm teksa ecët përpara në zbatimin e reformës në drejtësi, Gjykata Kushtetuese, pas tre vitesh përgjumjeje, filloi të funksionojë në fillim të këtij viti, duke iu bashkuar elementëve të tjerë të drejtësisë shqiptare, përfshirë SPAK dhe BKH. Falë përkushtimit të tyre, kemi filluar të shohim rezultate reale dhe pozitive në luftën kundër korrupsionit, krimit të organizuar dhe pandëshkueshmërisë”, shprehet ajo.
Në mesazhin e saj, Kim thotë se ngritja e SPAK dhe BKH ka dhënë rezultatet e para.
“Reforma në drejtësi nuk ka qenë e shpejtë apo e përsosur, por ajo ecën përpara duke sjellë më afër vendit që ju takon pranë Bashkimit Europian dhe SHBA0-së. Qytetarët gjatë këtij viti ushtruan të drejtën demokratike për të votuar. Pas zgjedhjeve, OSBE-ODIHR hartoi një raport ku vuri në dukje mangësi dhe parregullsi, dhe ne mirëpresim që t’iu mbështesim në përpjekjet për t’u përgjigjur rekomandimeve të ODIHR. Në emër të Ambasadës së SHBA, ju falënderojmë për vitin e mrekullueshëm që lamë pas së bashku dhe ju dërgojmë urimet më të mira për vitin që po vjen! Gëzuar Vitin e Ri”, thekson ambasadorja Kim në video-mesazhin e sajj.
Discussion about this post