Partia Demokratike ka hedhur akuza për manipulim sistematik dhe favorizime të paligjshme në procedurat e prokurimit publik që lidhen me menaxhimin e fondit pyjor, kullotave dhe zonave të mbrojtura. Në një deklaratë për mediat, zëdhënësja e Antikorrupsionit në PD, Genta Vangjeli, denoncoi një skemë të mirëorganizuar tenderash që, sipas saj, përfshin subjekte të lidhura me zyrtarë apo ish-zyrtarë të lartë të administratës publike, duke lënë jashtë sistemit mbi 800 inxhinierë pyjesh.
Sipas Vangjelit, të dhënat nga portale si “Open Procurement ” dhe “Open Corporates” tregojnë se tenderët për hartimin e planeve të mbarështimit pyjor shpërndahen thuajse ekskluzivisht te një grusht kompanish të njohura për lidhje politike dhe abuzime.
Në krye të listës qëndron kompania “Lurimi” shpk, në pronësi të ish-kreut të IKMT-së Dibër, Lutfi Miftari, e cila ka përfituar mbi 1 milion euro nga bashkitë si Prrenjas, Bulqizë, Shkodër, Cërrik, Tepelenë, Tiranë, Pogradec, Dropull dhe Përmet.
Një tjetër kompani e përmendur është “Diava Consulting” shpk, në pronësi të znj. Vjollca Diku, ish-drejtore pranë Agjencisë Kombëtare të Zonave të Mbrojtura, që ka përfituar rreth 600 mijë euro nga bashkitë Tiranë dhe Shkodër.
Ndërkohë, PD përmend edhe subjektet “Deja” shpk dhe “Arabel Studio” shpk, kjo e fundit në pronësi të Ana Nishkut, e arrestuar më herët nga SPAK për falsifikim dokumentesh në tenderin e Bashkisë Bulqizë, i cili implikoi edhe ish-kryebashkiakun Lefter Alla.
“Skandali teknik: plane të kopjuara dhe punime fiktive”
PD ngriti shqetësimin se shumë prej planeve të hartuara janë thjesht kopje të dokumenteve të vjetra, të përdorura jashtë afateve ligjore dhe pa asnjë evidentim real në terren. Sipas ekspertëve të PD-së:
-
Shumë plane janë hartuar në mënyrë të pamundur për një vit, nga të njëjtat subjekte që kanë përfituar disa kontrata paralele.
-
Në terren mungojnë totalisht sinjalistikat dhe ndarjet fizike që kërkohen nga manualet teknike.
-
Nuk janë ngritur sipërfaqet prove për inventarizim dhe nuk gjenden tabela ose shenja orientuese në pyje.
-
Shpenzimet për këto plane janë të larta dhe nuk përputhen me të dhënat zyrtare të kadastrës së fondit pyjor kombëtar.
Mosreagimi institucional dhe kërkesa për hetim
Partia Demokratike akuzoi ministren e Turizmit dhe Mjedisit, Mirela Kumbaro, për heshtje të qëllimshme dhe mosmarrje masash ndaj një skeme që dëmton interesin publik dhe pasurinë natyrore të vendit.
“Pasuria kombëtare është e shqiptarëve. Nuk është as e ministrave, as e drejtorëve, as e zyrtarëve të kësaj qeverie të korruptuar”, – theksoi Vangjeli.
PD kërkon nga Prokuroria dhe SPAK nisjen e menjëhershme të hetimeve për të identifikuar dhe ndëshkuar përgjegjësit ligjorë, si dhe për të ndalur monopolizimin e fondit pyjor në duar klienteliste.
Discussion about this post