Haredin Fejzulla, 58-vjeçari shqiptar i dënuar nga autoritetet belge me 29 vjet burg, është arrestuar nga policia në Madrid.
Një operacion i policisë Kombëtare spanjolle çoi në arrestimin e 10 personave, në lagjen Carabanchel të Madridit, mes të cilëve edhe Fejzulla, i akuzuar për drejtimin e një bande me bazë në Belgjikë që merrej me kultivimin dhe trafikimin e kanabisit, një biznes i paligjshëm me të cilin ata vlerësohet se grumbulluan një pasuri prej më shumë se katër milionë euro.
Ai u dënua në vitin 2022 me 29 vjet burg nga gjykata e Brukselit, por pas vendimit, u arratis për të shmangur burgimin.
Siç raportojnë mediat spanjolle, aksionet për gjetjen e tij kanë nisur në janar të vitit 2023, pas dyshimeve se ai mund të fshihej në Madrid. I arratisuri raportohet se mori masa të shumta sigurie për të mos u lokalizuar dhe kishte mjete të ndryshme me të cilat udhëtonte fshehurazi, si dhe shtëpi të shumta ku kalonte natën.
Ai ndërronte rregullisht edhe celularin. Megjithatë, u gjet të enjten e kaluar në lagjen Carabanchel kur po shkonte drejt një furgoni pranë një prej vendstrehimeve të tij.
Policia arrestoi Haredin Fejzullën bazuar në një urdhër-arresti të lëshuar nga autoritetet belge, vend në të cilin ai u dënua me më shumë se 29 vjet burg për 13 krime të trafikut të drogës, anëtarësimit në organizatë kriminale dhe falsifikimit të dokumenteve, mes viteve 2014 dhe 2018. Pas arrestimit, ai është vënë në dispozicion të Gjykatës, e cila duhet të vendosë nëse do ta ekstradojë në Belgjikë.
Rrjeti kishte një strukturë hierarkike të mirëpërcaktuar, me të arratisurin në krye që koordinonte të gjitha aktivitetet.
Grupi kriminal përdorte dokumentacion fals për të marrë shtëpi me qira dhe për të lidhur kontratat e energjisë elektrike në banesat ku kultivonin kanabis në masë. Ata gjithashtu rekrutuan njerëz për të punuar në kulturat e drogës. Hetimi nga autoritetet belge kundër bandës së Haredin Fejzulla kulmoi me çmontimin e 13 plantacioneve të kanabisit dhe arrestimin e anëtarëve.
Megjithatë, pasi u dënua, ai arriti të arratisej dhe Belgjika kishte lëshuar tre urdhër-arreste evropiane kundër tij. Ai ishte në listën e Europolit për të arratisurit më të kërkuar në Evropë, e cila mbledh së bashku të arratisurit më të kërkuar nga drejtësia në kontinent.
🚩Detenido en #Madrid uno de los “EUROPE’S MOST WANTED” reclamado por tráfico de drogas
Este hombre albanés había sido condenado a más de 29 años de prisión en #Bélgica por 13 cargos por tráfico de drogas, pertenencia a organización criminal y falsificación de documentos pic.twitter.com/bXd2Gs2WS9
— Policía Nacional (@policia) September 16, 2024
Discussion about this post