Nëse protesta e kaluar kishte si kryefjalë të saj “mosbindjen civile”, këtë të martë opozita do të udhëhiqet nga ideja e “bllokadës qytetare”, një slogan i ri që Sali Berisha e ka shpërndarë për ndjekësit e tij në rrjetet sociale.
Në protestën e radhës, tentohet paralizimi i lëvizjes në akset kryesore të vendit për të këmbëngulur tek qeveria teknike pa Edi Ramën, si parakusht për zhvillimin e zgjedhjeve të ardhshme parlamentare.
Me ndryshimin e slloganit, Berisha i ka shpëtuar edhe kurthit të “mosbindjes civile”, që i kërkohej protestuesve, ndërkohë që lideri vetë e respektonte masën e sigurisë “arrest shtëpie” që i ka caktuar SPAK.
Bashkë me idenë e bllokadës qytetare, në posterin e publikuar në rrjetet sociale janë shënuar edhe kryqëzimet që duket se të martën pas orës 17:00 do të paralizohen nga opozita dhe që janë:
- Segmenti Casa Italia – Sheshi “Shqiponja”
- Rrethrrotullimi Milot
- Rrethrrotullimi Shkozet
- Rrethrrotullimi Bradashesh
- Rrethrrotullimi Rrogozhinë
- Rrethrrotullimi Levan
Protesta pritet të zgjasë për plot tre orë.
Në një konferencë online me gazetarët këtë të hënë, Sali Berisha u pyet edhe për protestën e së martës. Ai tha se kjo protestë nuk do t’i kthehet në bumerang opozitës pasi po luftohet pikërisht për të drejtat e çdo qytetari.
“Po luftojmë për të drejtat, dinjitetin dhe lirinë e çdo qytetari që beson te vota e lirë dhe funksionimi i ligjit e Kushtetutës,” deklaroi Berisha. Sipas tij, Shqipëria pa opozitë është një katastrofë, ndërsa qeverinë e Edi Ramës e cilësoi si një regjim të urryer antishqiptar. Berisha përmendi statistikat e fundit të Eurostat-it, ku thuhet se nga viti 2014 deri në 2023, rreth 1.099.734 shqiptarë, si pasi tij, janë larguar nga vendi, shumica drejt vendeve të hapësirës Shengen. Ai theksoi se kjo shifër rritet nëse përfshihen edhe ata që kanë emigruar në SHBA, Mbretërinë e Bashkuar dhe Lindjen e Mesme, duke e konsideruar këtë si një pasojë të drejtpërdrejtë të politikave qeveritare.
Discussion about this post