“Sapo u ktheva nga SHBA dhe kryeva takimin me kreun e PD Lulzim Basha”. Kështu e ka nisur deklaratën për mediat ambasadorja Yuri Kim pak minuta pas takimit me kreydemokratin Basha. Me vizitën e saj në shtëpinë e Bardhë Kim theksoi se kishte folur me shumë ambasadorë dhe shtoi se kishte informuar shefat e saj për zhvillimet në Shqipëri.
Mes të tjerash ambasadorja tha se kishte shkuar në selinë blu për t’i treguar asaj atë çka kishte ngjarë. Ndërsa ndau me kryedemokratin Basha se Uashington e mbështet dhe mbetet e angazhuar për të punuar me partinë Demokratike, duke lënë të nënkuptuar “sfidën” e fundit që selia blu ka kaluar referuar debateve brenda PD-së, për “ndarjen” Berisha-Basha.
“Unë sapo jam kthyer para pak orësh nga Uashingtoni, ku kam pasur mundësi të flasë me drejtues nga të gjitha agjencisë, përfshirë DASH, Shtëpinë e Bardhë. Kam pasur mundësi të mund t’iu japë informacion shefave dhe kolegëve të mi për situatën në Shqipëri. Besoj që mendova se ishte tejet e rëndësishme që sapo të kthehesha të mund të vija në PD, për të ndarë me të atë që kam mësuar nga Uashingtoni. Ndava me kryetarin Basha që Uashingtoni mbetet i angazhuar për të vazhduar dhe për të punuar më ngushtësisht me PD”, tha ambasadorja Kim.
Ndër të tjera Yuri Kim nuk ka lënë pa i përcjellë një mesazh të tërthortë ish-kryeministrit Sali Berisha, i cili është shpallur “non grata” nga Departamenti Amerikan i Shtetit, duke u shprehur se PD duhet të shohë para dhe të japë kontributin në reformën territoriale dhe luftën ndaj korrupsionit. Po ashtu Kim, shtoi se duhet të ecë para më e fortë, e jo me një këmbë në të shkuarën, duke nënkuptuar liderin historik Sali Berisha.
“Pozita jonë ndaj pavarësisë, sovranitetit të Shqipërisë dhe PD nuk do të ndryshojë. Do ketë shumë punë për t’u bërë në vijim. Është thelbësore dhe e mirë që PD është kthyer në parlament me forca të plota. Por ka aksione që duhen ndërmarrë për të bërë zgjedhje më të mira herën tjetër. Për të adresuar mangësitë që u identifikuan në raportin e ODHIR. Duhet luftë për të bërë ndaj reformës territoriale dhe luftën kundër korrupsionit. Kërkojnë një PD të fortë që do të ecë para, kjo kërkon një parti demokratike që ecën përpara, nuk ecet përpara me një këmbë të mbetur në të shkuarën. Si gjithmonë mezi presim të ecim para me Shqipërinë, shqiptarët dhe PD drejt të ardhmes. Le të ecim përpara”, shtoi ambasadorja.
Ambasadorja amerikane Yuri Kim e cila duket se është mirinformuar nga çdo raportim lidhur me ndikimin e SHBA-ve në Shqipëri. Pas takimit me kryedemokratin Lulzim Basha, u shpreh se të gjitha aludimet ishin të gabuara dhe fyese. Po ashtu, ajo kujtoi vitin 1920 dhe ish-presidentin amerikan Udru Uillson, ndërsa shtoi se SHBA do vetëm që Shqipëria të jetë më e fortë dhe më sovrane.
“Kam parë raporte se ajo që ka ndodhur prek sovranitetin e Shqipërisë. Është e gabuar dhe fyese. I kujtoj të gjithëve se më 1920 kur bota donte që Shqipëria duhet të zhdukej, Ëillson tha që Shqipëria do të qëndrojë dhe më e fortë. Ndryshimi i vetëm është që tani ne duam që Shqipëria të jetë e fortë dhe më sovrane. Të gjithë ata që duan ta vendosin SHBA kundër qytetarëve u them se e keni gabim. Shqiptarët e dinë e keni gabim. Pozita jonë ndaj sovranitetin nuk do ndryshojë kurrë”, tha ajo.
Theksojmë se ky ishte takimi i parë i zhvilluar mes Ambasadores dhe kryedemokratit Lulzim Basha pas tensioneve në selinë blu, nga shpallja “non-grata” e Sali Berishës deri tek përjashtimi i tij nga Partia Demokratike.
