Megan Rapinoe, futbollistja legjendare e SHBA, ka vendosur ta mbyllë me futbollin e luajtur. Sulmuesja e cila gjatë karrierës ka fituar thuajse gjithçka me klube dhe kombëtaren, përfshirë edhe dy Botërorë dhe një medalje të artë olimpike, ka bërë të ditur se në mbyllje të këtij edicioni në kampionatin amerikan, ajo do t’i japë fund karrierës futbollistike.
E grumbulluar me kombëtaren amerikane, me të cilën do të synojë të fitojë përsëri titullin kampion pas atyre në vitet 2015 dhe 2019, ajo u shfaq sot para gazetarëve duke zbuluar vendimin për t’i dhënë fund karrierës në mbyllje të vitit 2023.
“Ky sport më ka bërë të përshkoj botën dhe më ka mundësuar që të njoh shumë persona të jashtëzakonshëm”, tha e emocionuar Rapinoe teksa zbulonte para mediave vendimin e saj për ta mbyllur me futbollin e luajtur.
Rapinoe ka qenë një emër shumë i njohur i futbollit botëror, por ajo mori më shumë famë në vitin 2019 kur i shpalli luftë të hapur presidentit të SHBA asokohe, Donald Trump, teksa udhëhiqte kombëtaren e saj drejt suksesit në Botërorin 2019, gjë që i solli edhe fitoren e “Topit të Artë” në atë vit.
Discussion about this post