Rastet e dhunës dhe ngacmimeve seksuale në shkolla, kanë nxitur reagimin e Partisë Demokratike. Deputeti Luçiano Boçi kërkon një riformatim të sistemit arsimor dhe një legjislacion të ri që përcakton qartë statusin e shkollës.
“Rastet e dhunës e ngacmimeve seksuale, ku përfshihen drejtues institucionesh arsimore e punonjës, nuk janë rastësi. Ato janë dëshmi e devijimit dhe rrënimit të një sistemi të tërë tashmë të kalbur. Ky sistem duhet riformatuar. Edukimi brenda tij ka humbur çdo vlerë e qëllimësi dhe shkolla është tërësisht e shkëputur nga funksioni social edukativ dhe me një funksion mësimdhënës mjeran. Duhet një legjislacion i ri që përcakton saktë statusin e shkollës, rolin e funksionin e saj në komunitet, përgjegjësitë e detyrat”, shprehet deputeti demokrat.
Boçi shkruan në Facebook se duhet një ripozicionim i figurës së mësuesit, ndërsa shtoi se mbushja e shkollës me militantë partiakë duhet të marrë fund.
“Duhet një ripozicionim i ri i figurës së mësuesit, detyrës e vlerësimit të tij si mësimdhënës dhe edukator. Duhet një sistem i ri karriere e vlerësimi për çdo drejtues dhe mësues. Duhet një sistem i ri inspektimi dhe kontrolli të cilësisë së mësimdhënies dhe edukimit. Duhet një rol i ri efikas dhe vendimmarrës i prindërve dhe komunitetit. Mbushja e shkollës me patronazhistë e komandime politike, lënia e saj në dorë të pasionantëve politikë pa vlera njerëzore dhe pedagogjike, duhet të marrë fund”, shprehet ai.
Rasti më i freskët i ngacmimit seksual në shkolla ishte ai i ditës së shtunë, ku drejtori i shkollës në fshatin Stropckë, Adriatik Haxhillari ka ngacmuar seksualisht dy nxënëse të moshës 14-vjeçare.
Discussion about this post