Deputeti i PD-së Ervin Salianji ka reaguar sot në lidhje me lidhur ngjarjen kriminale që ndodhi në Fier kur biznesmeni u ekzekutuar brenda makinës së tij në Fier. Përmes një postimi në Facebook, ai shprehet se qeveri Rama përveç se po degradon çdo ditë rendin dhe sigurinë publike, as nuk reagon si duhet për të tilla ngjarje. Sipas tij , krimi në Shqipëri ka arritur në nivele aq të larta, sa lajm përbëjë ditët kur nuk ndodhin ngjarje të tilla.
“Po ndodhin aq ngjarje të tmerrshme kriminale në çdo cep të territorit, sa ngjarja po mbulon ngjarjen në mënyrë ciklike dhe nuk po arrihet të kuptohet se çfarë po ndodh. Vrasjet e stilit mafioz janë shtuar, pasiguria e jetës dhe pronës, pasiguria e çdo elementi që përbën rendin e sigurisë publike bën që krimi mos ketë frikë dhe ta shohë si ortakëri me qeverinë. Shqipëria përveç pasigurisë që kanë shqiptarët nga ana ekonomike dhe sociale kanë edhe pasiguri të niveleve alarmante të sigurisë publike”, thotë ai.
Sipas Salianjit, është e frikshme që në situata të tilla policia nuk ka evidentuar asnjë të dyshuar si autor të ngjarjes. Ai thotë se, këto fakte tregojnë që Policia e Shtetit komandohet nga Rama dhe kjo tregon se bandat kriminale po rriten çdo ditë në vendin tonë. “Fakti që nuk ka asnjë të dyshuar tregon që krimi jo vetëm është në revansh, por është shumë përpara policisë së shtetit. Policët e thjeshtë janë të tradhtuar nga drejtuesit e tyre, të cilët politikisht përdoren nga kryepolici i Shqipërisë që është Edi Rama. Kjo tregon një bilanc të frikshëm dhe ankth për fuqinë që kanë bandat dhe krimi i organizuar të cilët mund të zgjedhin të eleminojnë cilindo dhe as mos kapen dhe as mos gjenden gjurmët e autorëve të këtyre krimeve”, tha ai.
Sipas Salianjit problemi qëndron te drejtuesit e policisë së shtetit dhe institucionet e sigurisë janë të politizuara.
