Një ngjarje makabre ka tronditur Italinë, pas zbulimit të një rasti të rëndë familjar që ka lënë pa fjalë edhe hetuesit më me përvojë. Një 25-vjeçare është arrestuar me akuzën se ka mbytur dy foshnjat e saj të porsalindura, trupat e të cilave i ka fshehur në një dollap, ndërsa dyshohet se ka vrarë edhe një tjetër fëmijë të lindur në vitin 2022.
Me urdhër të gjyqtarit hetues, ndaj saj është vendosur masa e arrestit në banesë me mbikëqyrje elektronike, ndërsa partneri i saj po hetohet për ndihmë dhe nxitje në kryerjen e krimeve.
Ngjarja makabre u zbulua në korrik të vitit 2024, kur nëna e të resë, e shqetësuar nga një erë e rëndë që vinte nga dhoma e vajzës, vendosi të kontrollonte. Ajo u përball me një skenë tronditëse: trupat e dy foshnjave të mbështjellë me batanije, të fshehur në një dollap. E shokuar, ajo njoftoi menjëherë policinë.
Hetimet zbuluan se më 8 korrik 2024, vajza kishte qenë e vetme në shtëpi mes orës 19:00 dhe 20:30 periudha kur dyshohet se ndodhi lindja dhe më pas mbytja e foshnjave. Prova të rëndësishme u gjetën edhe në Poliklinikën e Mesinës, ku 25-vjeçarja ishte paraqitur më vonë për shkak të një gjakderdhjeje të fortë. Analizat biologjike vërtetuan se foshnjat kishin lindur të gjalla dhe vdekja e tyre ishte shkaktuar nga mbytja.
E reja, gjatë qëndrimit në spital, mohoi kategorikisht se kishte qenë shtatzënë, pavarësisht shenjave të qarta fizike dhe situatës shëndetësore. Ndërkohë, hetuesit zbuluan se kjo nuk ishte hera e parë: në vitin 2022, çifti kishte kaluar një konflikt të ashpër për një shtatzëni të padëshiruar. Nga mesazhet e gjetura në celular, dyshohet se ajo kishte lindur edhe atëherë dhe kishte vepruar në mënyrë të ngjashme, duke i marrë jetën fëmijës së tretë dhe duke fshehur gjithçka.
Hetimet për këtë rast të tmerrshëm vazhdojnë, ndërsa autoritetet po përpiqen të zbulojnë nëse pas krimeve të heshtura fshihen edhe persona të tjerë që kanë pasur dijeni apo kanë ndihmuar në fshehjen e tyre.
Discussion about this post