Kryetari i Partisë Demokratike, Lulzim Basha, në një postim në tëitter ka reaguar për rritjen e çmimeve që sipas tij, ka qëllim t’ia kalojë barrën e korrupsionit. Ai kritikon mediat që nuk po merren me këtë problem duke akuzuar se po paguhen me paratë e korrupsionit.
“Ngritja e çmimeve ka vetëm një qëllim, t’ia kalojë barrën e korrupsionit dhe keqmenaxhimit familjeve shqiptare, gjysma e të cilave jeton në varfëri. Asnjë ekran televizioni që financohet me paratë e korrupsionit nuk e mbulon dot të vërtetën” – shkruan Basha.
Basha shprehet se gati gjysma e popullsisë jeton në varfëri, me më pak se 5 dollarë në ditë. Sipas tij, 41% e shpenzimeve totale të një familjeje shqiptare shkojnë për ushqime.
“Shumica prej jush mund ta ketë harruar, sepse keni kohë që e shihni veten në pasqyrën e deformuar të mediave që ushqeni me korruspsionin tuaj, por gati gjysma e popullsisë jeton në varfëri, me më pak se 5 dollarë në ditë. Po ashtu, 41% e shpenzimeve totale të një familjeje shqiptare shkojnë për ushqime. Kjo është shifra më e lartë në Europë, dhe ky buxhet i lartë që shpenzojnë për t’u ushqyer, është një tjetër tregues i varfërisë, por edhe çmimeve të larta në raport me të ardhurat të vërteta të shqiptarëve” -thekson Basha.
Kreu demokrat, janë edhe pensionistët që orvaten midis dyqaneve dhe farmacive për të blerë sa munden me atë pak që kanë, për të mbajtur veten gjallë.
“Janë edhe pensionistët që orvaten midis dyqaneve dhe farmacive për të blerë sa munden me atë pak që kanë, për të mbajtur veten gjallë. Janë të rinjtë dhe të rejat që enden të papunë, midis dëshirës për të lënë këtë vend dhe dashurisë për të dhe familjen e tyre që i mban ende këtu, me shpresën se një ditë do të bëhet më mirë edhe për ta”- shprehet Basha.
Ditën e sotme Basha ka pasur debate në parlament ku ka ngritur shqetësimin e çmimeve dhe problemeve që po kalon vendi.
