Ndonëse reshjet e shiut kanë ndaluar prej disa ditësh, jugu i vendit ende vuan nga mungesa e energjisë elektrike. Fshatrat e Gjirokastrës, kryesisht në Bashkinë e Dropullit ende nuk furnizohen me energji elektrike. Konkretisht Zagori, Grapsh, Dropull i Poshtëm dhe Dropulli i Sipërm, banorët e të cilëve shprehen se kanë që të premten pa energji e madje pa ujë. Ata tregojnë se në fshat 80% e banorëve janë të moshuar, të cilët pa energji elektrike nuk mund të kujdesen për veten e tyre.
“Keq jemi, as ujë as drita! Pa drita s’bën dot asgjë, që të vijë lart uji tek kuzhina s’ka korrent se nuk punon pompa. Kemi që të premten pa energji.
Ne të moshuar jemi, këtu në fshat 80 për qind janë të moshuar dy nga dy ose një person vetëm në shtëpi. Kur s’ka drita, frigoriferi shkrin, ushqimet prishen.”
Temperaturat e ulëta të dhjetorit e bëjnë akoma më të vështirë përballimin e kësaj situate për banorët e fshatrave të Gjirokastrës, të cilët theksojnë se nuk kanë me çfarë të ngrohen, pasi jo të gjithë janë të pajisur me soba druri.
“Për tu ngrohur jo e jo, vetëm ata që kanë sobë me dru, të tjerët që s’kanë veç nëpër batanije dhe jorganë. Jemi si në vitet ’44, si në dorës së tretë. Defektet ndodhin here pas herë, i njëjti problem por nuk na e vë njeri veshin”, shprehen banorët.
OSSH ka theksuar se po punon për rregullimin e defekteve në furnizimin me energji elektrike në zonat problematike.
Discussion about this post