Nipi i eksponentit të PS-së Sadri Abazi po përlan pjesën e luanit nga fondet e Bashkive, por edhe ato të ministrive. Arbri Abazi, brenda pak javëve, pas zgjedhjeve të 14 majit ka marrë pjesë në disa tenderë dhe i ka fituar ato në shkelje të ligjit. Dhurata e fundit i është bërë nga Bashkia Sarandë, që drejtohet nga Adrian Gurma.
Ky është një super tender për nga vlera dhe ka si objekt “Pastrimin dhe largimin e mbetjeve urbane”. Fondi limit që xhirohet nga taksat e bashkisë drejt kompanisë së Abazit është rreth 1.3 miliardë lekë. Dhe këto para janë dhënë duke shkelur rregullat bazë të ligjit “ Për Prokurimet Publike.
Së pari, shohim se tenderi ka marrë “Red Flag” nga Open Data Albania, portali monitorues, për shkak se këtij prokurimi i mungon konkurrenca e dejtë. Në dokumentet e tenderit tregohet se kanë paraqitur ofertat e tyre 7 operatorë ekonomikë, por 6 prej tyre janë skualifikuar në fazën e parë e të garës pa argumente për arsyen e fshirjes nga lista.
Kështu, në tavolinë mbeti vetëm oferta e “ALKO IMPEX CONSTRUKSION”SH.P.K, në pronësi të Arbër Abazit, që është nipi i Sadri Abazit. Oferta e tij ka qenë në vlerën 1.3 miliardë lekë, pra sa 100% e fondit limit. Ndërkohë, ligji kërkon që të merren parasysh ofertat më të lira.
Gjithashtu, duke qenë si e vetmja kompani që ka shfaqur interes, pronari Abazi mori fitoren në mungesë të konkurrencës. Në këtë mënyrë 1.3 miliardë lekë po keqpërdoren pa u respektuar standardet minimale të parashikuara nga ligji.
Ndërkohë, kujtojmë se pak javë më parë, Agjencia e Përqendruar e Prokurimeve zhvilloi tenderin miliarda lekë për pastrimin në qytetet bregdetare, përfshirë edhe Sarandën. Një tjetër fakt që hedh dyshime mbi vlerën shumë të madhe të tenderit.
Kujtojmë se vetëm disa ditë më parë ministri i Mbrojtjes Niko Peleshi i dha 4 miliardë lekë për ndërtimin e një hangari nipit të Sadri Abazit. Ky tender për hangarin në brendësi të Bazës Ajrore të Farkës, u zbulua se ishte zhvilluar pa garë.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post