Që pas ndarjes së posteve në Partinë Socialiste, duket se shumë figura brenda saj nuk po e mbajnë dot zhgënjimin që nuk fituan poste në qeveri dhe me postet e reja brenda PS. Dyshimet i ka shtuar sekretari i Përgjithshëm, Damian Gjiknuri me mesazh që i ka dërguar “live” paraardhësit të tij në post, Taulant Ballës.
Në një intervistë për mediat, ku u pyet për Taulant Ballën, i cili u vendos drejtues politik në Fier nga kryeministri Edi Rama, Gjiknuri tha se Balla ka bërë një punë të mirë në Elbasan, por duhet që të kujdesej më shumë për karrierën e tij politike.
Në formën e një paralajmërimi, socialisti i ka bërë me dije Ballës se duhet të kujdesej për karrierën e tij politike, e të mos e hidhte poshtë për “kapriço”.
“Balla ka bërë një punë të mirë në Elbasan, tani është vendosur në një qark tjetër për të drejtuar, sepse kjo është bërë edhe për arsye të politikave të PS brenda partisë, për një rifreskim të qarqeve. Megjithatë do i thoja që mos të hedhë poshtë të gjithë karrierën politike për një kapriço personale,”- tha Gjiknuri.
Në Asamblenë e PS-së, Balla u caktua për të drejtuar qarkun e Fierit, nga ku edhe doli në kundërshtim me Gjiknurin. Ky i fundit nuk u shpreh i kënaqur nga rezultati, ndërsa Balla nuk i kurseu lavdet për paraardhësin e tij në qark, Gramoz Ruçin.
Po ashtu në ditën e Asamblesë, ku Gjiknuri zuri vendin e Ballës si drejtues politik në Elbasan, deputeti shigjetoi Gjiknurin duke u shprehur me kunj duke thënë se “s’bie tërmet në Elbasan”, duke iu referuar edhe batutës së Gjiknurit, e cila u zbardh gjatë përgjimeve të dosjes “184”. Mesa duket lufta e ftohtë mes socialistëve ka nisur.
