Nis mbledhja e Këshillit Kombëtar të PD, pritet të shkarkohen përkrahësit e Berishës

Ka nisur mbledhja e Këshillit Kombëtar të Partisë Demokratike, e cila u paralajmërua ditën e djeshme nga kreu i saj, Lulzim Basha.

Në këtë mbledhje pritet të ndërmerren vendime ndaj atyre që ditën e djeshme, kryedemokrati Lulzim Basha tha se kishin shpërdoruar funksionet dhe simbolet e partisë, në kundërshtim me urdhrat dhe vendimet zyrtare.

Sipas informacioneve, pritet që në këtë mbledhje të shkojnë edhe anëtarë që janë mbështetës të ish-liderit historik, Sali Berisha.

Kujtojmë se ditën e djeshme, kreu i selisë blu, në konferencën pas mbledhjes së Kryesisë së Partisë Demokratike, paralajmëroi që ditën e sotme mbledhjen e Këshillit Kombëtar, duke zbuluar edhe rendin e ditës që ka të bëjë me diskutimin dhe miratimin e një Rezolute lidhur me situatën e jashtëzakonshme të krijuar nga veprimtaria antistatutore që dëmton rëndë interesat politike dhe elektorale të PD. Si dhe miratimin e propozimit të Kryesisë për shkarkimin e Kryetarit të Këshillit Kombëtar dhe disa anëtarëve të Kryesisë për shkelje të rënda të Statutit të PD dhe vendimit të Kryesisë të datës 15 Nëntor.