Ka nisur me debate mbledhja e Grupit Parlamentar në selinë e Partisë Demokratike, pasi ish-kryeministri Sali Berisha injoroi vendimin e Enkelejd Alibeaj për deputetët e përjashtuar dhe shkoi në mbledhje.
Mësohet se Alibeaj ka pasur debate me Berishën në mbledhje duke i thënë se është një sinjal i brishtë për demokracinë dhe nuk duhet të ishte pasi është përjashtuar.
“Prezenca juaj në këtë sallë është një sinjal i brishtë për demokracinë e brendshme në parti. Z.Berisha me prezencën tuaj ju po zhvlerësoni vendimet e organeve të kësaj partie. Ju jeni i përjashtuar nga grupi parlamentar dhe çdo forum”, tha Alibeaj.
Nga ana tjetër, ish-kryeministri i është kundërpërgjigjur me vendimin e Gjykatës duke i thënë se Komisioni i Rithemelimit është i vetmi organ që merr vendim.
“Z.Alibeaj më vjen keq për këtë qëndrim, pasi jua kam thënë edhe pak ditë më parë dhe po jua përsëris, unë ju respektoj si kryetar grupi, por çdo organ vendimmarrës në këtë parti ka qenë ilegjitime pas 11 dhjetorit. I vetmi organ që merr vendime është Komisioni i Rithemelimit”, tha Berisha.
Sipas burimeve, në mbledhje janë të pranishëm edhe të gjithë deputetët që u shkarkuan nga ish-kryetari i PD-së Lulzim Basha, ndërsa vetë ky i fundit ka refuzuar të shkojë.
Discussion about this post