Me ardhjen e datës 27 shtator, rreth 500 mijë nxënës mbushën oborret e shkollës, mes të cilëve mbi 30 mijë do të ulen për herë të parë në banka. Edhe këtë vit mësimi nuk do të zhvillohet në kushte normale. Në disa shkolla do të kenë orë 25 minutëshe, ndërsa të tjera do të funksionojnë me katër turne.
Ditën e djeshme prindërit kanë reaguar në lidhje me turnet, duke nisur një peticion, i cili do t’i drejtohet institucioneve arsimore, pasi janë të pakënaqur që fëmijët e tyre të realizojnë procesin mësimor në këtë lloj mënyre.
Mësuesit duhet të kenë certifikatë vaksinimi ose test të përjavshëm ndaj COVID-19. Po ashtu në klasa është detyrueshme maska, distanca si dhe mësimi zhvillohet me orë fikse.
Si fillim, shkolla ishte planifikuar të nisej me datë 13 shtator, por në një deklaratë për shtyp, Ministrja e Arsimit dhe Sportit, Evis Kushi, lajmëroi se ajo do të shtyhej me datë 27 shtator 2021.
Kushi sqaroi se nga data 1 shtator deri në 24 shtator mësuesit do të zhvillojnë mësim plotësues për vitin e shkuar shkollor. Të gjithë mësuesit do të jenë në shkollë me orar të plotë që prej 1 shtatorit, ndërsa nxënësit nuk janë të detyruar të shkojnë përditë në shkollë.
Një ditë më parë ministrja e Arsimit dhe Sportit, Evis Kushi uroi të gjithë nxënësit që të hënën do të rikthehen në bankat e shkollës.
Nëpërmjet një video-mesazhi ministrja Kushi shprehet se në të gjitha shkollat janë marrë masat për mbarëvajtjen e vitit shkollor. Ajo gjithashtu ftoi nxënësit të respektojnë masat anti-Covid pasi shëndeti është elementi më i rëndësishëm në këto kohë pandemie.
Gjithashtu, kryeministri Edi Rama mëngjesin e kësaj të hëne e ka nisur me një urim për të gjithë nxënësit e arsimit parauniversitar.
Rama përmes një postimi në rrjetin social Facebook shkroi se uron çdo nxënës për një vit sa më të mbarë dhe të suksesshëm shkollor për një të ardhme më të mirë.
Mesazheve për nxënësit dhe mësuesit iu janë bashkangjitur edhe kryetari i Partisë Demokratike bashkë me presidentin e Shqipërisë, Ilir Meta.
Në ditën e parë të shkollës, Basha bën apel që të mos mungojë kujdesi për të mbrojtur shëndetin pasi edhe ky viti i ri shkollor do të jetë sfidues.
Ndërsa Meta teksa publikon një foto i ulur mes nxënësve në bankat e shkollës, i uron që ky vit i ri shkollor të jetë plot arritje të shkëlqyera në rrugën e dijes, veçanërisht për vogëlushët që ulen sot për herë të parë në bankat e shkollës! /O.B/ Gijotina.com
