Nisin nesër aplikimet për përfitimin e granteve në sektorin e bujqësisë. Lajmin e ka bërë të ditur Agjencia për Zhvillim Bujqësor dhe Rural, e cila bën thirrje që agrobizneset dhe individët e interesuar për të përfituar grante përmes raundit të katërt të programit IPARD2, duhet të nisin me dorëzimin e planeve të biznesit dhe dokumentacionit përkatës nga data 10 Janar 2022.
“Njoftojmë thirrjen e Katërt për dorëzimin e aplikimeve në kuadër të Programit IPARD II) me qëllim të zhvillimit të Sektorit Agro – Ushqimor. Thirrja e katërt për aplikime është e hapur për të gjithë personat fizikë dhe juridikë, puna dhe veprimtaria e të cilëve zhvillohet brenda territorit të vendit në fushat e prodhimit bujqësor /ose të agro-përpunimit dhe rural”, thuhet në njoftim.
Sipas të dhënave, në këtë thirrje do të mbështetet masa 7, konkretisht “Diversifikimi i fermave dhe zhvillimi i biznesit” e kufizuar në vetëm në këto sektorë: Turizmi rural dhe i Natyrës; Punimet e artizanatit dhe industria e manifaktures; Prodhimi i energjisë së rinovueshme.
Më tutje, përcaktohet se, buxheti i përgjithshëm në dispozicion të kësaj thirrje është 4.1 milion EURO nga të cilat 75% kontribut i BE dhe 25% kontribut i buxhetit të shtetit. Totali i shpenzimeve të pranueshme për ndihmën e kërkuar do të jetë në kufijtë minimal 10 mijë EURO dhe maksimal 400 mijë EURO. Granti i vënë në dispozicion është 65% të totalit të kostove të pranueshme të investimit. Ndërsa, theksohet se dorëzimi i aplikimeve fillon nga data 10 Janar 2022 deri në datën 25 Shkurt 2022, nëpërmjet dërgesës postare apo dorazi.
Discussion about this post