NASA ka bërë një premtim të pazakontë në kulmin e emocioneve të Kupës së Botës 2026.
Agjencia amerikane e hapësirës ka njoftuar se, nëse kombëtarja e Shteteve të Bashkuara shpallet kampione e botës, një top zyrtar i turneut do të dërgohet në Hënë.
Deklarata është bërë nga administratori i NASA-s, Jared Isaacman, gjatë një aktiviteti kushtuar planeve për ndërtimin e një baze në Hënë.
Ai e cilësoi nismën si një sfidë simbolike për ekipin amerikan, duke lidhur suksesin në futboll me ambiciet e SHBA-së në eksplorimin hapësinor.
“Është një sfidë për skuadrën: ju bëni pjesën tuaj në fushë, ne bëjmë tonën në hapësirë”, deklaroi Isaacman.
Premtimi vjen në një kohë kur Botërori 2026 po zhvillohet në Shtetet e Bashkuara, Kanada dhe Meksikë.
Sipas raportimeve, NASA ka dërguar më parë një top futbolli në Stacionin Ndërkombëtar Hapësinor, ndërsa tashmë synimi është që ai të arrijë deri në sipërfaqen e Hënës.
Nisma kujton edhe një nga momentet më ikonike të historisë së eksplorimit hapësinor, kur astronauti Alan Shepard, gjatë misionit “Apollo 14” në vitin 1971, goditi simbolikisht një top golfi në Hënë.
Nëse SHBA arrin të fitojë për herë të parë Kupën e Botës, premtimi i NASA-s mund të shndërrohet në një tjetër moment historik, duke bashkuar futbollin me eksplorimin e hapësirës.
Discussion about this post