Dinamo dhe Vllaznia janë ndarë në një barazim pa gola në ndeshjen hapëse të javës së 14-të të Kategorisë Superiore, me portierin 17 vjeçar Simon Simoni që shpëtoi disa herë “blutë”.
“Blutë” e nisën pjesën e parë vrullshëm dhe në minutën e tretë bardhi tenton portën, por gjuajtja e tij diagonale ishte e gabuar dhe përfundoi jashtë. Demiri humbi një mundësi të artë në të 12-ën, kur gjuajtja e tij përfundoi mbi traversë. Bardhi u tregua sërish vendimtar kur dha një pasim për Mihanën nga e djathta, por ishte Zogoviç ai që shpëtoi shkodranët në minutën e 29-të.
Në pjesën e dytë Vllaznia tentoi të vinte në presion të besuarit e Bledi Shkëmbit, por adoleshenti Simoni u tregua disa herë vendimtar. Në minutën e 65-të Dianje kaloi dy lojtarë në krahun e djathtë dhe dërgoi harkim drejt qendrës, por Simoni shpëtoi portën.
Zëvendësuesi i Bakajt dëshmoi nivel të lartë kur Aralicën duke e devijuar topin mbi portë. Një minutë para kohës së rregullt Simoni ishte sërish në gatishmëri kur Mustedanagiç gjuajti nga distanca.
Me këtë rezultat Vllaznia mban vendin e tretë në kampionat me 25 pikë ndërsa Dinamo është e shtata me 14 pikë, në pritje për t’u luajtur ndeshjet e tjera të Superligës.
Discussion about this post