Nga Françeska Ndoja
Atmosfera në Qytetin Studenti s’është më e njëjta e disa ditëve më parë, ku studentët po bëheshin gati për fillimin e sezonit të ri shkollor. Lajmi për ardhjen e afganëve ka ndryshuar jetën, por edhe përditshmërinë e studentëve dhe banorëve të QS. Sot, mbizotëronte qetësia dhe heshtja, ndërsa në parkun e afërt ca të moshuar kishin temën e përfolur “afganët” dhe bashkëjetesa me ta. Dyzimi mes mikpritjes dhe frikës janë dy gjërat që vërehen në sytë, por edhe në fjalët që qytetarët shprehin. Banorët e përhershëm të Qytetit Studenti kanë ndjenja të dyzuara mbi atë që po ndodh dhe mënyrën se si do të menaxhohet situata.
Godina të boshatisura, dyert të mbyllura, të cilat pengojnë çdo lloj informacioni, fytyra që presin të shohin se çfarë do sjellë ora në vijim është situata e krijuar në “qytetin e të rinjve”. Ditët kalojnë, ndërsa afganët akoma s’kanë ardhur në Shqipëri, edhe pse vendet ku ato do të akomodohen janë gati. Në Qytet Studenti në Tiranë, Durrës, Berat dhe Lezhë.
Në Qytet Studenti do të vihen në dispozicion 7 godina për ta. Banorët e vetëm që kanë mbetur, pas largimit me urdhër të studentëve, janë pensionistët, të cilët shfrytëzojnë hijen e pemëve për të ndërruar ndonjë muhabet. Por edhe ata jetojnë me situatën aktuale, ku shprehen se janë dakord me ardhjen e tyre, por mënyra si u nxorën studentët jashtë godinave ishte jo e duhura, duke qenë se u lajmëruan në momentin e fundit.
Por ka nga ata qytetarë që ndihen të frikësuar, por edhe të pasigurte, të cilët nuk pranojnë të prononcohen mbi këtë çështje, megjithëse mimika e fytyrës së tyre tregon shumë. “Unë personalisht kam respekt për ta. Edhe Italia hapi portat për ne, janë hallexhinj për momentin. Por, varet si do sillen. Frika është mos na vjen ndonjë tjetër mes tyre… Por s’e di a është i përshtatshëm vendi që kanë zgjedhur për t’i strehuar. Janë një komunitet që ka nevojë për përshtatje, janë me trauma lufte, unë i shoh si individë që kanë nevojë për përkrahje”, shprehet një nga të moshuarit.
Për ardhjen e afganëve, nuk pranon te prononcohet as drejtoresha e QS, Anila Shehu e cila largohet menjëherë sapo merr vesh që në institucionin e saj kanë mbërritur gazetarët. E shpejtë dhe me përgjigje të shkurtër, Shehu tha se nuk ka asnjë informacion dhe nuk di asgjë se çfarë do të ndodhë. Duke na adresuar drejt Bashkisë së Tiranës për çdo informacion.
Studentët i sheh të trembur teksa ecin rrugës dhe nuk pranojnë të ndalen për të bashkëbiseduar me gazetarët, për vetë faktin se do të bashkëjetojnë me shtetasit afganë. Një studente, e cila banon në godinën 16 tregoi se nuk e di ca po ndodh dhe se janë të frikësuar.
Një gjë është e sigurt se përveç faktit se pandemia ndryshoi jetën e studentëve, tashmë një problem më shumë u është shtuar këtyre studentëve dhe banorëve, të cilët do të bashkëjetojnë me afganët, për të cilët qeveria thotë se do të jetë një periudhë të përkohshme, por sa do të zgjasë, kjo do mësohet vetëm kur avioni i parë me afganë, që pritet prej ditësh, të zbresë në Rinas. /Gijotina.com
