Çfarë pritet? Një ditë pas dorëzimit të mandatit të deputetit, Jurgis Çyrbja thirret sërish në SPAK

Pak orë pasi dorëzoi mandatin e deputetit, SPAK ka thërritur sërish sërish Jurgis Çyrbjen.

Siç bëjnë me dije burime, Çyrbja është njoftuar për t’u paraqitur këtë të premte në orën dhjetë.

Deputeti Çyrbja, në paraqitjen e tij 72 orë më parë në SPAK, u pyet për gati 5 orë, por në dalje ai nuk pranoi që të flasë dhe të tregojë detaje.

Pritet që deputetit Jurgis Çyrbja t’i komunikohet akuza e “Shpërdorimit të detyrës” të kryer në 4 raste.

Kjo lëvizje juridike është kryer nga prokurori Dritan Prençi, i cili për gati tre vite hetime pretendon se ka konstatuar shkelje ligjore në 4 raste të legalizimit të objekteve pa lejë të ndërtuara në Durrës.

Këto shkelje sipas prokurorit Prençi, janë kryer na ish-drejtori i Hipotekës në Durrës, aktualisht deputeti i PS, Jurgis Çyrbja si dhe disa vartës të tij në hipotekë dhe ALUIZNI-t në Durrës.

Të gjitha këta zyrtarë dhe ish-zyrtarë, tashmë janë marë të pandehur dhe pritet që në ditët në vijim, SPAK të delegojë dosjen kundër tyre në gjykatë për shqyrtim gjyqësor.

Ndërkohë ikja e Jurgis Çyrbja nga parlamenti, duke dorëzuar mandatin e deputetit të PS, është konsideruar si një lëvizje juridike-strategjike, me shpresën për t’i shpëtuar ndjekjes penale nga Prokuroria e Posaçme.

Nga ana tjetër Çyrbja, ka argumentuar kërkesën për lënien e mandatit të deputetit, si një domosdoshmëri për tu marë me problemet shëndetësore.

Deputeti socialist u thirr në SPAK për një kallëzim të Edi Palokës në zgjedhjet e 2021.

Paloka e akuzonte për shpërdorim detyre në kohën kur drejtonte hipotekën e Durrësit.

Në atë kohë drejtues politik i qarkut Durrës, Edi Paloka, ka çuar në SPAK deputetin aktual për “shpërdorim detyre”, për firmosjen brenda të njëjtës ditë të dy praktikave për të njëjtën pronë, por në dy emra të ndryshëm, duke realizuar kështu mbivendosje prone.

Në të njëjtën kohë, Paloka pretendoi se edhe javët e fundit të fushatës Çyrbja ka qenë i pranishëm në Kadastrën e Durrësit duke shpërndarë çertifikata dhe legalizime, njësoj sikur të ishte ende drejtor Hipoteke.

Deputeti demokrat tha në atë kohë në një deklaratë për mediat, se në SPAK janë depozituar kallëzimet penale për drejtuesit e institucioneve vendore në Durrës që janë përfshirë në blerjen e votave, si dhe një seri shtetasish që duke shpërndarë para apo përmes kërcënimeve synuan të tjetërsojnë vullnetin e votuesve.

Vendin e Çyrbjes në Kuvend pritet që ta zërë Erjon Meka, i cili në zgjedhjet e fundit mori 2228 vota.