Një ditë pasi Monika Kryemadhi u thirr në SPAK për të dëshmuar për aferën e inceneratorëve, ditën e sotme ka qenë deputeti demokrat Gazment Bardhi që është nisur drejt SPAK. Mësohet se Bardhi do të pyetet nga Prokuroria e Përgjithshme Kundër Korrupsionit dhe Krimit të Organizuar në lidhje me inceneratorin e Elbasanit. Bardhi do të pyetet nën cilësinë e personit që ka bërë kallëzimin për këtë çështje.
Kujtojmë se dje, pas më shumë se dy orësh në SPAK, deputetja e Partisë së Lirisë Monika Kryemadhi tha për gazetarët se ka dorëzuar prova të reja për vjedhjen e parave me inceneratorin e Elbasanit.
Kujtojmë se ish ministri Lefter Koka është aktualisht në burg për shkak se rezulton i përfshirë në skandalin me inceneratorin e Elbasanit. Sipas prokurorisë ish ministri ka marrë ryshfet 3.7 mln euro për ndërtimin e tij.
Ndaj ish ministrit të Mjedisit rëndojnë tre akuza, ajo e “korrupsionit”, “shpërdorimit të detyrës” dhe ajo e “pastrimit të parave”. Lefter Koka u arrestua më 14 dhjetor me urdhër të SPAK për çështjen e inceneratorit të Elbasanit, ndërsa më pas SPAK kërkoi ndaj tij masë arrest me burg pasi dyshohet si i përfshirë edhe në inceneratorin e Fierit.
Discussion about this post