Kryetari i PD-së, Sali Berisha, ka reaguar për vrasjen me thikë në zemër të 14-vjeçarit Martin Cani nga një bashkëmoshatar i tij.
“Nxënësit Martin Cani, 14-vjeç, sportist i talentuar, i morën dje jetën tek dera e shkollës”, shkruan Berisha, një ditë pas krimit tronditës që i mor jetën adoleshentit jashtë ambienteve të shkollës 9-vjeçare “Fan Noli”.
Berisha u shprehu ngushëllimet familjarëve, shokëve dhe ekipit ku stërvitej 14-vjeçari Marin Cani.
“Ngushëllimet më të ndjera familjes, shokëve, miqve, ekipit të 14-vjeçarit, Martin Cani, që i morën jetën me një mori thikash në trupin e tij të njomë”, shkruan kryedemokati.
Ai shtoi se dënon me forcën me të madhe aktin makabër dhe autorët e tij, që i morën jetën nxënësit 14-vjeçar.
Reagimi
Një yll u shua!
Nxënësit Martin Cani, 14-vjeç, sportist i talentuar, i morën dje jetën tek dera e shkollës.
Ngushëllimet më të ndjera familjes, shokëve, miqve, ekipit të 14-vjeçarit, Martin Cani, që i morën jetën me një mori thikash në trupin e tij të njomë, në derë të shkollës.
Ngjarje e dhimbshme, tronditëse për familjen, shkollën, ekipin, qytetin dhe mbarë shoqërinë. Çdo nxënës, çdo prind, çdo qytetar ndjehet fortë i lënduar dhe i pakësuar nga vrasja e Martinit me çantën e shkollës mbi supe.
Dora vrastare në narkoshtet ka licencë të vrasë kudo.
Shkolla, që pas familjes duhet të jetë vendi i dytë më i sigurt për fëmijët tanë, u kthye në pusi për Martinin bash në sytë e bashkëmoshatarëve, mësuesve, oficerit të policise që paguhet për siguri të lartë.
Sherrnaja thuaj një javore, midis të rinjve përfundoi me ekzekutimin publik të Martinit.
Pas aktit kriminal të fundit në vendngjarje erdhën ambulanca dhe forcat e policisë, por shumë vonë, atëherë kur aty para tyre kishin mbërritur kamerat e televizioneve.
Megjithatë, ministri i krimit që paguan oficer policie për sigurinë e çdo shkolle, rrahu gjoksin me “Smart City”, kurse Korba e Kovidit në krye të Ministrisë së Arsimit lau duart me një breshëri akuzash ndaj të tjerëve.
Ky është shteti i krimit!
Discussion about this post