Njëlloj si Tuci, Kreshnik Hajdari mori 20 mln lekë për një rrugë

SPAK arrestoi tre ditë më parë ish-kryetarin e Bashkisë Fushë-Arrëz, Fran Tuci, se kishte ndërtuar një rrugë rurale në një zonë Pyjore me fondet e komunitetit.

Tuci, momentalisht po qëndron në burg, pasi prokuroria pretendon se në cilësinë e kryebashkiakut, ka miratuar një leje për ndërtimin e rrugës me fondet private të komunitetit.

Por, sipas Oranews, paralelisht me këtë rast, është riregjistruar e njëjta procedurë dhe në bashkinë e Kuçovës.

Kryebashkiaku i këtij qyteti Kreshnik Hajdari, ka shtruar rrugën me çakull, duke përdorur fondet private të komunitetit.

Praktika e kryerjes së punimeve ka ndodhur në fshatin Frashër të Kuçovës, e cila është e njëjta praktikë që ka ndodhur në Fushë-Arrëz dhe që tashmë çoi në burg Fran Tucin dhe dy persona të tjerë.

“…Fëmijët tanë jetojnë jashtë shtetit, shumica prej tyre në Angli dhe dy vite më parë kur erdhën shkuan në bashki për ndërtimin e rrugës me fondet e tyre. Për këtë rrugë që nuk u bë kurrë janë paguar 15 mijë Paundë, rreth 20 milion lekë në bashkinë e Kuçovës. Ne se dimë në çfarë zyre u dhanë lekët e fëmijëve, por ajo që dimë është që i çuan në bashki. Pas kësaj erdhën disa punëtorë të një firme, që vetëm gërmuan disa ditë dhe ikën…”-,pohojnë banorët, raporton Oranews.

Ndërsa një tjetër banore shprehet se: “…E lanë rrugën…erdhi deri këtu e lan. Dolëm dhe i thamë: pse e le rrugën…?. Ndërsa ai tha: “…mbaroi fondi, kaq qe…”.

Rruga ekzistuese, është ndërtuar që në periudhën e komunizmit, por për shkak të amortizimit qe shkatërruar nga gropat e rrëshqitje në disa vende.

Banorët në përditësi shfaqnin vështirësi në kalueshmëri të mjeteve si në dimër ashtu edhe në verë. Banorët e fshatit Frashër akuzojnë bashkinë e Kuçovës për vjedhjen e rreth 20 milion lekëve, kontribut financiar që u mblodh nga banorët për rregullimin e rrugës dhe sërish asgjë nuk u përmirësua dhe nuk u mësua se ku shkoi investimi i tyre për rrugën.

Pritet që në ditët në vijim, banorët ti drejtohen prokurorisë së Posaçme SPAK, me një kallëzim penal për “Shpërdorim detyre”, kundër kryetarit aktual të bashkisë Kuçovë, Kreshnik Hajdari, raporton Oranews.