Noka nga protesta e PD: Edi Rama dhe banda e tij nuk do të kenë qetësi

Ka nisur protesta e Partisë Demokratike për kundërshtimin e rezultatit të zgjedhjeve, me pretendimin se ato ishin të manipuluara.

Mbështetës të kësaj force politike si dhe përfaqësues të PD-së dhe partive të tjera opozitare që ishin në koalicion me të, janë mbledhur në hyrje të Bulevardit “Zogu I” në Tiranë.

Aktualisht në protestë mungon Sali Berisha, i cili ndodhet në Bruksel.

Flamur Noka shprehet se Edi Rama dhe banda e tij nuk do të kenë qetësi pas rezultatit të 11 Majit.

“Patronazhimi, përdorimi i administratës dhe bandave kriminale ishin ato që ndikuan në tjetërsimin e votës së shqiptarëve. Kjo nuk mund të pranohet kurrën e kurrës.

Faktori ndërkombëtar e vuri gishtin mbi plagë. 750 000 pensionistëve iu ble vota me 100 euro. Falja e 150 000 gjobave dy ditë para zgjedhjeve, blerje vote është.

Edi Rama nuk do të ketë qetësi, as banda e tij. Misioni i PD nuk është pushteti por shenjtërimi i votës në Shqipëri. Dilni takoni sot qytetarët, në 10 qytetarë, 7 thonë se kanë votuar PD-në”, tha Flamur Noka për mediat.