Tenori i famshëm italian Andrea Bocelli ka paditur një kompani ajrore charter. Ai e akuzon biznesin në fjalë se ka shkelur një marrëveshje duke i dhënë një mjet fluturimi më të vjetër dhe më të zhurmshëm vitin e kaluar teksa mbante një turne në SHBA. Artisti 64 vjeçar ngriti një padi kundër Shërbimeve Private Jet të Seabrook në gjykatën e New Hampshire para një muaji. Tenori gjithashtu pretendon se kompania ka shkelur kushtet e kontratës së saj kur një anëtar i ekuipazhit njoftoi se do të kishte një udhëtim me turbulence nga Kalifornia në Cleveland.
Sipas padisë, Bocelli, i cili përjeton siklet dhe frikë gjatë fluturimeve për shkak të shikimit të tij të dëmtuar, dyshohet se ka kërkuar që të mos bëhen njoftime për motin gjatë fluturimit “për të shmangur shkaktimin e ankthit të panevojshëm”.
Këngëtari i “Con te partirò” kërkon trefishin e shumës që kishte paguar për 15 fluturimet, të cilat kishin arritur në 569,800 dollarë. Shuma që ai kërkon thuhet se mbulon avokatët, dëmet dhe ndryshimet që ai duhej të bënte në fluturimet e tij.
Sipas padisë, përfaqësuesi i Bocellit nënshkroi një kontratë me kompaninë për të rregulluar fluturimet për datat e turneut të tenorit në Shtetet e Bashkuara në nëntor dhe dhjetor. Marrëveshja parashikonte që avionët “në mënyrë ideale nuk duhet të jenë ‘më të vjetër’ se 4 vjet”
Bocelli është i ndjeshëm ndaj zhurmave të larta gjatë fluturimeve me aeroplan. Gjatë fluturimit nga Kalifornia në Cleveland, kompania siguroi një Falcon 2000 të prodhuar në 1996, përveç njoftimit të ekuipazhit për turbulencat.
Hyrja në aeroplanin e vjetër dhe dëgjimi i njoftimit “i shkaktoi atij ankth dhe frikë për sigurinë e tij gjatë 20 minutave të fundit të fluturimit”, sipas padisë.
“Ai gjithashtu ka frikë nga aeroplanët dhe ankth lidhur me çështjet e sigurisë gjatë fluturimeve”, thuhet në padinë e ngritur nga avokati i tij. “Në veçanti, ai është i ndjeshëm ndaj zhurmës së shtuar që tenton të bëjë një aeroplan i vjetër gjatë fluturimit dhe kjo zhurmë i shkakton atij edhe më shumë ankth dhe pasiguri.”
Sipas padisë, linja ajrore anuloi fluturimet për datat e fundit të turneut, por nuk i ktheu paratë, duke e detyruar Bocellin të nënshkruante një kontratë me një kompani të re që i kushtoi më shumë se 300,000 dollarë.
Discussion about this post