Nuk e lanë të shikonte djalin në spital, gruaja godet rojën dhe kafshon policin

Një 39-vjeçare është arrestuar nga Policia e Tiranës, pasi ka goditur një punonjës policie.

Ngjarja ka ndodhur në Spitalin e Traumës, ndërsa përveç policit, 39-vjeçarja ka goditur edhe një punonjës për shërbimin privat të sigurisë fizike.

Sikurse mësohet, Henxa Deliu kishte kërkuar të futej në ambientet e brendshme të spitalit teksa djali i saj po merrte trajtim.

Pasi roja nuk e lejoi, 39-vjeçarja e goditi. Më pas, roja lajmëroi policët për ta larguar, por gruaja kafshoi në shpatull njërin prej policëve dhe e goditi.

Gruaja është arrestuar për veprat penale “Kundërshtimi i punonjësit të policisë së rendit publik” dhe “Goditjet për shkak të detyrës”

Njoftimi

Specialistët për Hetimin e Krimeve të Komisariatit të Policisë Nr. 3 arrestuan shtetasen H. D., 39 vjeçe, banuese në Tiranë, për veprat penale “Kundërshtimi i punonjësit të policisë së rendit publik” dhe “Goditjet për shkak të detyrës”, parashikuar nga nenet 236 dhe 237 të Kodit Penal. Kjo shtetase, në ambientet e SUT, ka kundërshtuar me forcë dhe ka goditur një punonjës Policie, si dhe një punonjës për shërbimin privat të sigurisë fizike.