Nënkryetarja dhe deputetja e Partisë Demokratike Grida Duma i është kundërpërgjur kryeministrit Edi Rama mbi planin e prezantuar duke thënë se plani i vërtetë është të marrë borxh që OSHEE dhe KESH të vazhdojnë të bëjnë tendera e të fitojë para një grusht njerëzish.
Në një deklaratë nga selia blu, deputetja Duma është shprehur se nuk është çështje e krizës energjitike por krizë korrupsioni dhe keqmenaxhimi. Sipas Dumës 200 milionë euro, që do të shkojnë për të arnuar me paratë e konsumatorëve e sipërmarrësve ato kafshatat milionëshe që shqyen për orekset e tyre këtë verë.
“Prej ditësh Partia Demokratike ka thënë që nuk është çështje e krizës energjitike, por se pari e mbi te gjitha krizë korrupsioni dhe keqmenaxhimi. Ndërkohë plani i vërtetë është të marrë borxh që OSHEE dhe KESH të vazhdojnë të bëjnë tendera e të fitojë para po ai grusht njerëzish që e hapi këtë gropë, që në asnjë rast nuk vjen nga jashtë, por nga shushunjat e korrupsionit që gjallojnë në ekosistemin e kësaj pakice.
Dhe nuk janë pak. 200 milionë euro, që do të shkojnë për të arnuar me paratë e konsumatorëve e sipërmarrësve ato kafshatat milionëshe që shqyen për orekset e tyre këtë verë” – është shprehur Duma.
Më tej ajo tha se e gjithë kriza lidhet me abuzimet që qeveria ka bërë tenderët dhe PPP. PD, thotë Duma i bën thirrje SPAK që të nisë hetimet, ndërsa shprehet se po përgatiten kallëzimet për abuzimet e kësaj qeverie.
“Që ata 500 mijë shqiptarë që kanë ikur nga sytë këmbët, në fakt nuk kanë qenë të zotët t’ia dalin në Shqipëri, pikërisht ata që janë të zotët t’ia dalin kudo nëpër botë. I tha shqiptarëve sot që shteti nuk është Zoti, individi duhet t’ia dalë vet. Patjetër, ia del, në një vend ku zotësia ka vend. Jo në një vend ku batakçiu fiton dhe i ndershmi mbaron. E rrotulloi edhe njëherë gjuhën tek e kaluara, sepse zgjodhëm 30 vjet më parë ekonominë e tregut, jo ekonominë e tij të tollonit. Por 30 vite më pas, ndërsa ka qeverisur gjatë gjysmës së tyre na ofron prapë tollonat e mungesës ushqimore.
U tha shqiptarëve nuk rrisim rrogat se s’bëjmë dot investime, por po të ishin bërë investime dhe jo korruptime, rrogat tashmë do të ishin rritur. Jemi vendi i fundit në ballkan, sepse nuk janë investime, janë PPP, paratë e pista të palacollëqeve. PPP-të miliona euroshe që firmosen si pa të keq, duke ua hedhur në kurriz sa këtij brezi e sa atyre që do vijnë për dekada me radhë. Bashkë me arbitrazhet që janë dora e gjatë e korrupsionit të këtij pushteti në xhepat tuaj. Bashkë me broxhin publik që është kacek me korrupsionin e kësaj lukunie të babziturish. Janë të gjitha aty dhe ai nuk mund të ofrojë asnjë zgjidhje, sepse ai dhe shpura e tij janë shkaktarët e kësaj fatkeqësie kombëtare, që e quan veten qeveri, e që sot kërkon nga ju edhe qindarkat e fundit, sepse nuk heq dorë nga PPP-të dhe dhe tenderat korruptiv. Partia Demokratike i bën thirrje SPAK të nis urgjentisht hetimet, ndërkohë Partia Demokratike po bën gati kallzimiet në SPAK për abuzimet monsturoze dhjetra milionëshe të qeverisë së Ramës, të OSHEE dhe KESH, në kurriz të familjeve shqiptare” -u shpreh Duma.
Kujtojmë se për deklaratën e kryeministrit ka reaguar edhe kreu i opozitës i cili e ka konsideruar si vjedhje e pastër duke përdor OSHEE.
