Shefi i Fondit Shqiptar të Zhvillimit, Dritan Agolli ka firmosur një super tender me projekt të paqartë, që të mjegullohet vjedhja. Pasi mbaroi me tenderët e rikualifikimit të blloqeve të banesave në 4 Rajonet e Shqipërisë, ku u hodhën miliarda lekë përmes kontratave pa garë, Agolli tashmë do të arnojë rrugët në këto rajone.
Sot po raportojmë tenderin me objekt ‘Ndërhyrje për përmirësimin e shtresave asfaltike, Rajoni 1 dhe 2 (Faza IV)’. Burimi i financimit: Programi buxhetor GOA (Government of Albania) për periudhën 2024-2026.
Shohim që Agolli ka pronotuar fonde edhe nga buxhetet e 2 viteve të ardhshme që ende nuk janë konkretizuar.
“Nisur nga shqetësimi i përfaqësuesve të Njësive të Veteqeverisjes Vendore (NjVV) stafi i FSHZH ka hapur thirrjen për evidentimin në terren dhe projektimin të disa prej akseve rrugore, të cilat janë me problematikë për qarkullimin e automjeteve. Verifikimi në terren do te behet kryesisht per akset rrugore, të cilat lidhin zona turistike dhe që kanë potencial për zhvillimin e ekonomisë, kjo në përputhje dhe komplementare me programet e zhvillimit rajonal si programi për 100 fshatrat, etj. Pas rikonjicionit në terren të këtyre akseve rrugore do te përzgjidhen segmentet në te cilat konstatohen dëmtime te shtresave rrugore, gjendja teknike e shtresave rrugore është jashtë standardit dhe lëvizja e automjeteve bëhet me vështirësi si dhe konsiderohen akse me prioritet nga NjVV per t’u rehabilituar. Përfituesit do të jenë të gjitha Bashkitë në të cilat do të aplikohet ndërhyrja”, kështu thuhet në projektin teknik për rrugët që akoma nuk dihet se cilat do të jenë!
Për të tilla procedura duhen hartuar e sqaruar në detaje investimet që do të bëhen, në cilat zona, cilat rrugë do të ri-asfaltohen, sa para do të shkojnë për secilin zë?
Këto pika nuk gjenden në dokumentet e tenderit, i cilat duhet të justifikojë këtë “çek’ të Agollit me vlerën 12 miliardë lekë.
Tenderi pa garë
FSHZH e ka hapur “garën” më 17 shtator 2024 dhe e ka mbyllur me 18 tetor 2024, ditën që është zhvilluar edhe vlerësimi. Komisioni nuk është lodhur shumë me procedurat për zhvillimin e konkursit, pasi nuk kishte konkurrencë.
Në fakt, ishin 6 kompani që shfaqën interes, por propozimet e tyre nuk janë marrë në konsideratë. Kreu i FSHZH e kishte caktuar fituesin me kohë dhe procedurë ka qenë formale.
Siç veprohet rëndomë në prokurime me vlerë të madhe, komisioni i Agollit i ka skualifikuar nga gara të gjithë pjesëmarrësit e tij dhe ka çuar për në finale vetëm ofertën e firmës “BAMI” në pronësi të Besnik Bamit.
Ky i fundit kishte propozimin me vlerë 8.6 miliardë lekë, me të njëjtën vlerë janë prezantuar edhe dy oferta të tjera, por janë skualifikuar pa asnjë argument.
Kështu Bami është shpallur menjëherë fitues dhe kontrata është bërë publike më datë 24 tetor.
Open Data Albania i ka ngritur ‘Flamurin e Kuq’, si shenjë e riskut të korrupsionit në këtë prokurim. “Skualifikim i të gjithë operatorëqve ekonomikë përveç fituesit”, ky është argumentimi nga monitoruesi për këtë vlerësim.
Dhuratat për Bamin
Kujtojmë se Bami është përfitues i koncesionit të Aeroportit të Kukësit, i cili shumicën e kohës nuk është në funksion.
Operatori ekonomik “Bami” sh.p.k. në bashkëpunim me firmën “Global Technical Mechanichs” u shpallën fitues të tenderit me objekt “Zgjerimin e aeroportit të Kukësit dhe operimin për 35 vjet të tij me koncesion”. Sipas marrëveshjes të firmosur me qeverinë në vitin 2019, fituesit duhet të investojnë rreth 8 milionë euro pa TVSH dhe më pas do të kenë të drejtë të shfrytëzojnë të ardhurat nga aeroporti për 35 vjet. Pra deri në 2054 Bami do vazhdojë të marrë nga paratë e shqiptarëve. Me sa duket nuk mjaftojnë këto, por duhen edhe tendera të tillë nga Dritan Agolli në favor të Besnik Bamit.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post