Nuk ka surpriza në Durrës, pasi Partia Socialiste ka fituar edhe një Bashki tjetër në vend. Kandidatja e PS, Emirjana Sako, ka siguruar numër më të madh të votave, ndjekur nga kandidati i Shtëpisë së Lirisë, Ardian Muka, dhe ai i PD, Luan Hoti.
Emiriana Sako numëron 39.157 vota duke shënuar një diferencë të thellë me vendin e dytë, kandidatin e “Shtëpisë së Lirisë”, Ardian Mukën i cili ka marrë 20.831 vota, ndjekur nga Luan Hoti i PD me 7937 vota.
Në një postim në facebook, Sako shpreh falenderimet për të gjithë qytetarët e Durrësit që e votuan, teksa zotohet se do të punojë me përkushtim në detyrën e saj.
“Falenderoj të gjithë qytetarët e Durrësit për besimin e dhënë për të vazhduar punën për transformimin e qytetit. Kjo fitore është një përgjegjësi e madhe që më jep privilegjin t’i shërbej me përkushtim e pasion qytetit dhe të gjithë qytetarëve të Durrësit”, shkruan Sako.
Partia Socialiste ka fituar 5 nga 6 bashkitë ku u mbajtën zgjedhjet, ndërsa në Shkodër prite të shpallet fitues Bardh Spahia nga “Shtëpia e lirisë”, ndërsa PD është renditur forcë e tretë.
Discussion about this post